बाभूळगाव प्रतिनिधी: राज्याचे मृदा व जल संधारण मंत्री तथा जिल्ह्याचे पालकमंत्री मा. संजय राठोड यांच्या अध्यक्षतेखाली दि. ०२ मार्च रोजी सकाळी १० वाजता नगर पंचायत सभागृह, बाभूळगाव येथे आढावा बैठकीचे आयोजन करण्यात आले आहे.
या बैठकीपूर्वी विशेष स्वागत समारंभआयोजित करण्यात आला असून, सकाळी बाभूळगाव मुख्य बस स्टॉप येथे मा संजय राठोड यांचे स्वागत करण्यात येणार आहे. या कार्यक्रमात स्थानिक नागरिक, पदाधिकारी, शेतकरी व विविध संघटनांचे प्रतिनिधी उपस्थित राहून त्यांचे स्वागत करणार आहेत.
या आढावा बैठकीत बाभूळगाव तालुक्याच्या सर्वांगीण विकासाबाबत सखोल चर्चा होणार असून, मृदा व जलसंधारण विभागाशी संबंधित योजना, जलसंधारण प्रकल्प, शेतीसाठी पाण्याची उपलब्धता, पाझर तलाव, बंधारे, गाळमुक्त धरण अभियान आदी विषयांवर महत्त्वपूर्ण निर्णय घेतले जाण्याची शक्यता आहे. तसेच, तालुक्यातील इतर विकास कामे, लोककल्याणकारी योजना आणि स्थानिक समस्या यांचाही आढावा घेतला जाणार आहे. या माध्यमातून तालुक्याच्या प्रगतीला नवीन दिशा मिळेल आणि विकासाच्या कामांना गती येईल, अशी अपेक्षा आहे.
संजय राठोड हे यवतमाळ जिल्ह्याचे पालकमंत्री म्हणून नेहमीच स्थानिक विकासासाठी प्रयत्नशील राहिले असून, या बैठकीतून तालुक्यातील जनतेला मोठा दिलासा मिळेल, अशी भावना व्यक्त होत आहे.
