करकंब, प्रतिनिधी – नितीन फाटे:
तीर्थरुपी धर्माधिकारी यांच्या जयंतीनिमित्त दि. १ मार्च २०२६ रोजी करकंब शहरात भव्य स्वच्छता अभियान राबविण्यात आले. डॉ. श्री नानासाहेब धर्माधिकारी प्रतिष्ठान (रेवदंडा, ता. अलिबाग, जि. रायगड) यांच्या वतीने हा उपक्रम आयोजित करण्यात आला.
पद्मश्री पुरस्कार सन्मानित, महाराष्ट्र भूषण तथा राज्यपाल नियुक्त स्वच्छता दूत डॉ. श्री आप्पासाहेब धर्माधिकारी आणि डॉ. श्री सचिन दादा धर्माधिकारी यांच्या मार्गदर्शनाखाली करकंबसह राज्यभर हा उपक्रम राबविण्यात आला. त्याचाच एक भाग म्हणून करकंब शहरात व्यापक स्तरावर स्वच्छता मोहीम पार पडली.
या अभियानांतर्गत करकंब–पंढरपूर रोडवरील परिसर, विविध शासकीय कार्यालये, ग्रामपंचायत ते मोडनिंब रोड, सरकारी दवाखाना तसेच स्मशानभूमी परिसरात स्वच्छता करण्यात आली. सुमारे २०० ते २५० स्वयंसेवकांनी उत्स्फूर्त सहभाग नोंदवत शहर स्वच्छतेचा संदेश दिला.
“स्वच्छ शहर – सुंदर शहर” या संकल्पनेला बळकटी देण्यासाठी करकंबकरांनी दिलेला प्रतिसाद उल्लेखनीय ठरला. या उपक्रमामुळे शहरात स्वच्छतेबाबत जनजागृती निर्माण झाली असून सामाजिक बांधिलकीचे दर्शन घडले.
