कणकवली प्रतिनिधी
कणकवली तालुक्यातील नरडवे गावातील चर्मकार वस्ती पवारवाडी येथे अनेक वर्षांपासून रखडलेली विकासकामे अखेर मार्गी लागण्यास सुरुवात झाली आहे. जिल्हा परिषद सदस्य संदेश उर्फ गोट्या सावंत यांनी स्वतः उपस्थित राहून विकासकामांचा शुभारंभ केला.
गेल्या ४० ते ५० वर्षांपासून या वस्तीमध्ये अंतर्गत रस्ते, स्ट्रीट लाईट व पाणीपुरवठा यांसारखी मूलभूत कामे प्रलंबित होती. काही स्थानिक मतभेदांमुळे ही कामे रखडलेली होती. मात्र जिल्हा परिषद निवडणुकीनंतर सर्व प्रश्न मार्गी लावण्याचा दिलेला शब्द संदेश सावंत यांनी पूर्ण केला असल्याची भावना ग्रामस्थांनी व्यक्त केली.
नरडवे येथे भेट देत अवघ्या काही मिनिटांत प्रलंबित विषयावर तोडगा काढण्यात आला. अंतर्गत काँक्रीट रस्ते, वाढीव वस्त्यांतील रस्ते तसेच स्ट्रीट लाईट उभारणीची कामे लवकरच पूर्ण करण्यात येणार असल्याचे त्यांनी सांगितले. यावेळी रस्त्याचे भूमिपूजन करून प्रत्यक्ष कामाला सुरुवात करण्यात आली.
कार्यक्रमास नरडवे गावचे विद्यमान सरपंच गणपत सावंत, माजी उपसरपंच वैभव नार्वेकर तसेच पवारवाडीतील ग्रामस्थ मोठ्या संख्येने उपस्थित होते. अनेक वर्षे प्रलंबित असलेल्या प्रश्नांना मार्ग मिळाल्याने ग्रामस्थांनी समाधान व्यक्त करत संदेश उर्फ गोट्या सावंत यांचे आभार मानले.
लवकरच पवारवाडीमध्ये रस्ते, पाणी व स्ट्रीट लाईट सुविधा उपलब्ध होऊन वस्ती विकासाच्या दिशेने वाटचाल करेल, असा विश्वास यावेळी व्यक्त करण्यात आला.
