लातूर प्रतिनिधी –
लातूर जिल्ह्यात कायदा व सुव्यवस्था अबाधित राखण्यासाठी तसेच गुन्हेगारी प्रवृत्तीवर आळा घालण्यासाठी जिल्हा पोलीस दलामार्फत सातत्याने विशेष मोहिमा राबविण्यात येत आहेत. त्या अनुषंगाने पोलीस अधीक्षक श्री. अमोल तांबे यांच्या मार्गदर्शनाखाली स्थानिक गुन्हे शाखेकडून लातूर शहरात अवैध धंदे व संशयित इसमांवर कारवाई करण्यासाठी विशेष गस्त व तपास मोहीम सुरू आहे.
दि. २७ फेब्रुवारी २०२६ रोजी स्थानिक गुन्हे शाखेचे पथक शहरात गस्त घालत असताना रात्री सुमारे २३.१५ वाजण्याच्या सुमारास गुप्त बातमीदारामार्फत माहिती प्राप्त झाली की, शाहू कॉलेज जवळील महानगरपालिका पार्किंग परिसरात रोहित कतारी नावाचा इसम संशयास्पदरीत्या बसलेला असून त्याच्याकडे धारदार शस्त्र आहे.सदर माहितीची खातरजमा करून रात्री २३.३० वाजता शाहू कॉलेज जवळील महानगरपालिका पार्किंग येथे पोलीस पथक पोहोचले असता तेथे एक तरुण बसलेला आढळून आला.
त्यास ताब्यात घेऊन नाव व पत्ता विचारला असता त्याने आपले नाव रोहित शेरसिंग कतारी (वय १८ वर्षे, रा. वीर हनुमंतवाडी, लातूर) असे सांगितले. त्याची अंगझडती घेण्यात आली असता त्याच्या कमरेला एक लोखंडी कोयता आढळून आला. सदर शस्त्र बेकायदेशीररीत्या बाळगलेले असल्याचे निष्पन्न झाल्याने सदर कोयता ताब्यात जप्त करण्यात आला. सदर प्रकरणी आरोपी रोहित शेरसिंग कतारी याच्याविरुद्ध शस्त्र अधिनियम कलम ४/२५ प्रमाणे पोलीस ठाणे गांधी चौक येथे गुन्हा दाखल करण्यात आला असून पुढील तपास सुरू आहे. ही कारवाई पोलीस अधीक्षक अमोल तांबे, अपर पोलीस अधीक्षक मंगेश चव्हाण यांचे मार्गदर्शनात स्थानिक गुन्हे शाखेचे पोलीस निरीक्षक सुधाकर बावकर यांच्या नेतृत्वातील पथकामधील पोउपनि राजेश घाडगे, पोउपनि अमर केंद्रे, सफौ सर्जेराव जगताप, संजय कांबळे, रियाज सौदागर, प्रशांत स्वामी, व्यंकटेश निटूरे, चंद्रकांत केंद्रे, तसेच उपविभागीय पोलीस अधिकारी कार्यालय लातूर शहर येथील महेश पारडे व गणेश मोरे यांनी पार पाडली.
लातूर जिल्ह्यात कायदा व सुव्यवस्था राखण्यासाठी तसेच अवैध शस्त्रे बाळगणाऱ्या व्यक्तींवर कठोर कारवाई करण्यात येत आहे.
