प्रतिनिधी : पातूर तालुक्यातील गावंडगाव पांगरताटी परिसरात आज पहाटेच्या सुमारास ऑटो पलटी झाल्याची दुर्घटना घडली. पांगरताटी येथील मजूर रोजंदारीसाठी बाहेरगावी जात असताना गावंडगाव येथील पुलाजवळ त्यांच्या ऑटोसमोर अचानक डुक्कर आडवे आल्याने चालकाचे वाहनावरील नियंत्रण सुटले आणि ऑटो रस्त्याच्या कडेला पलटी झाला. या भीषण अपघातात एकाचा मृत्यू झाला असून अनेक मजूर जखमी झाले आहेत.
मिळालेल्या माहितीनुसार, पहाटे अंधुक प्रकाशात मजूर ऑटोतून कामासाठी निघाले होते. पुलाजवळ अचानक डुक्कर धावत आल्याने चालकाने वाहन वाचवण्याचा प्रयत्न केला; मात्र वाहन घसरून उलटले. अपघात इतका तीव्र होता की ऑटोमधील प्रवासी रस्त्यावर फेकले गेले.
अपघाताचा मोठा आवाज ऐकून परिसरातील ग्रामस्थांनी तात्काळ घटनास्थळी धाव घेतली. जखमींना बाहेर काढून त्यांना त्वरित जवळच्या रुग्णालयात उपचारासाठी दाखल करण्यात आले. काही जखमींची प्रकृती गंभीर असल्याची माहिती मिळत आहे.
दरम्यान, गंभीर जखमी असलेले राजू दामू जाधव (रा. पांगरताटी) यांचा उपचारादरम्यान मृत्यू झाला. त्यांच्या निधनाने पांगरताटी परिसरात शोककळा पसरली आहे.या घटनेमुळे शिवार परिसरात मोकाट जनावरांचा वाढता त्रास पुन्हा एकदा समोर आला आहे. अपघाताचे नेमके कारण व इतर बाबींचा चान्नी पोलिसांकडून तपास सुरू आहे.
