परभणी / प्रतिनिधी : रमेश मुलगीर
दि. ८ मार्च रोजी शेळगाव येथे शेतकरी नेते ॲड. अजित काळे यांचा जाहीर सत्कार करण्यात आला. परभणी जिल्ह्यातील शेतकऱ्यांच्या विविध प्रश्नांवर सातत्याने आवाज उठविणारे आणि शेतकरी हक्कांसाठी लढा देणारे नेते म्हणून त्यांचा गौरव करण्यात आला.
विशेषतः २०२० सालच्या पीक विमा प्रकरणात परभणी जिल्ह्यातील सुमारे ८५ हजार शेतकऱ्यांना तब्बल ६५ कोटी रुपयांचा विमा मिळवून देण्यात त्यांनी महत्त्वाची भूमिका बजावली. ही केस त्यांनी कोणतेही मानधन किंवा फी न घेता शेतकऱ्यांसाठी लढवली आणि शेतकऱ्यांना त्यांच्या हक्काचा विमा मिळवून दिला.
या पार्श्वभूमीवर आयोजित भव्य सत्कार समारंभ व शेतकरी हक्क परिषद उत्साहात पार पडली. कार्यक्रमास शेतकरी संघटनेचे पदाधिकारी, कार्यकर्ते तसेच परिसरातील अनेक शेतकरी मोठ्या संख्येने उपस्थित होते.
कार्यक्रमस्थळी लावण्यात आलेल्या फलकावर शेतकऱ्यांच्या हक्कासाठी लढा देण्याचा संदेश देण्यात आला होता. तसेच २०२० मध्ये परभणी जिल्ह्यातील शेतकऱ्यांना पीक विमा मिळवून देण्यासाठी केलेल्या संघर्षाचा विशेष उल्लेख करण्यात आला.
यावेळी ॲड. अजित काळे यांचा पारंपरिक पद्धतीने फेटा बांधून, शाल व श्रीफळ देऊन सत्कार करण्यात आला. कार्यक्रमादरम्यान शेतकऱ्यांच्या विविध समस्या, पीक विमा, शेतीमालाचे दर तसेच शेतीसाठी आवश्यक सुविधा या विषयांवर सविस्तर चर्चा करण्यात आली.
उपस्थित मान्यवरांनी आपल्या भाषणातून शेतकऱ्यांच्या हक्कांसाठी संघटित लढा उभारण्याचे आवाहन केले. तसेच शेतकऱ्यांच्या न्याय्य मागण्यांसाठी शासनाकडे सातत्याने पाठपुरावा करणे आवश्यक असल्याचे मत व्यक्त केले.
या कार्यक्रमास शेतकरी संघटनेचे अनेक पदाधिकारी, कार्यकर्ते व परिसरातील शेतकरी बांधव मोठ्या संख्येने उपस्थित होते. कार्यक्रमाचे वातावरण उत्साहपूर्ण व प्रेरणादायी होते.
