छत्रपती शिवाजीमहाराज उद्यानासाठी जत नगरपरिषद हद्दीत दोन एकर जागा उपलब्ध करून द्यावी

जत /प्रतिनिधी.

हिंदवी स्वराज्य संस्थापक छत्रपती शिवाजी महाराज उद्यान व
मराठा समाज सांस्कृतिक भवनसाठी दोन एकर जागा उपलब्ध करून द्यावी, मराठा समाजाची जत नगरपरिषदेकडे शिष्टमंडळाद्वारे लेखी मागणी.

प्रत्येक ठिकाणी मराठा समाज वगळता इतर समाजाची समाज मंदिर आहेत परंतु मराठा समाजाचे आमदार, खासदार, मंत्री व प्रशासकीय सेवेत असणारे अधिकारी यांना वाटत नाही का की, आपल्याही समाजाचे प्रत्येक तालुका स्थरावर सांस्कृतिक भवन असावे. जेणेकरून मराठा समाजाच्या विविध उपक्रमासाठी या सांस्कृतिक भवनाचा वापर करता येईल.

जत नगरपरिषद हद्दीत मराठा समाज सांस्कृतिक भवनसाठी व छत्रपती शिवाजी महाराज उद्यानासाठी जत नगरपरिषदेने जागा उपलब्ध करून द्यावी यासाठी आम्ही वरचेवर मागणी करूनही आम्हाला जागा उपलब्ध करून दिली जात नाही. तरी जत नगरपरिषद हद्दीत छत्रपती शिवाजी महाराज उद्यानासाठी व मराठा समाज सांस्कृतिक भवनसाठी जागा उपलब्ध करून देण्यात यावी.

रयतेचे राजे हिंदुस्थानचे आराध्य दैवत छत्रपती शिवाजी महाराज उद्यानासाठी ही जत नगरपरिषदेने दोन एकर जागा उपलब्ध करून द्यावी. यापूर्वी छत्रपती शिवाजी महाराज उद्यानासाठी जत येथील हराळे समाज वसाहतीशेजारील शासकीय ओढापात्रात जत नगरपरिषदेने जागा उपलब्ध करून त्या ठिकाणी लाखो रुपये खर्च करून उद्यानाची उभारणी केली होती. परंतु जागेच्या मालकीवरून वाद निर्माण झाल्याने या उद्यानाकडे तत्कालीन जत ग्रामपंचायतीने दुर्लक्ष केल्याने या ठिकाणी असलेले व लाखो रुपये खर्च करून उभारण्यात आलेले छत्रपती शिवाजी महाराज उद्यान खरेच अस्तित्वात होते की काय असे म्हणण्याची वेळ जत  शहर - रवासियांवर आली आहे.

यानंतर जत सांगली रस्त्याशेजारील सार्वजनिक बांधकाम विभाग कार्यालयाच्या बाजूस असलेल्या महाराष्ट्र जीवन प्राधिकरण विभागाच्या जागेवर जत नगरपरिषदेने लाखो रुपये खर्च करून छत्रपती शिवाजी महाराज उद्यानाची उभारणी केली आहे. परंतु सध्या जत नगरपरिषदेच्या जाणीवपूर्वक दुर्लक्षामुळे या उद्यानाची दुरावस्था झाली असून लोखंडी अँगल व पत्रा लावून उद्यानाचे नाव लिहिलेल्या बोर्डावरील अक्षरे नाहीशी झाली आहेत. उद्यानातील झाडें नाहीशी झाली आहेत. उद्यानात लहान मुलांसाठी लाखो रुपये खर्च करून उभारण्यात आलेली लोखंडी करमणूक साधने गंजून बाद झाली आहेत. अबालवृधाना बसण्यासाठी ठेवण्यात आलेले सिमेंट बाक मोडले आहेत.

अशी उद्यानाची दुर्दशा झाली असतानाच छत्रपती शिवाजी महाराज यांच्या उद्यानाच्या जागेवरच जत नगरपरिषदेची भव्यदिव्य अशी इमारत उभारणार असल्याने छत्रपती शिवाजी महाराज यांच्या नावे असलेल्या जत शहरातील उद्यानाचे अस्तित्वच नष्ट होणार असल्याने उपनगराध्यक्ष विक्रम ताड यांनी छत्रपती शिवाजीमहाराज उद्यानासाठी जत नगरपरिषद हद्दीत दोन एकर जागा उपलब्ध करून द्यावी अशा मागण्याचे निवेदन मराठा समाजाचेवतीने जत नगरपरिषदेकडे दिले आहे.

यावेळी मराठा सेवासंघांचे जत तालुका अध्यक्ष राजेंद्र पाटील, जत दूरदर्शन पतसंस्थेचे चेअरमन दीपक ( दादा ) शिंदे, डॉ. महेश भोसले, बाळासाहेब माने, मछिंद्र बाबर आदी उपस्थित होते.