शहादा : नंदुरबार जिल्ह्यातील शहादा तालुक्यातील कहाटुळ गावातील ६५ वर्षीय राणुबाई दुलब इशी यांच्या मृत्यूचे गूढ अखेर पोलिसांनी उलगडले आहे. राणुबाई यांचा खून गावातीलच ६५ वर्षीय व्यक्तीने केल्याचे तपासात समोर आले असून पोलिसांनी आरोपीला अटक केली आहे. सतत पैसे मागत असल्यामुळे वैतागून डोक्यात वार करून व नंतर गळा आवळून राणुबाई यांची हत्या केल्याची कबुली आरोपी भिला लोटन माळी याने दिली आहे.
पोलिसांनी दिलेल्या माहितीनुसार, कहाटुळ येथील राणुबाई दुलब इशी या ८ फेब्रुवारीपासून घरातून बेपत्ता होत्या. त्यांच्या शोधासाठी कुटुंबीयांकडून प्रयत्न सुरू होते. दरम्यान, ३ मार्च २०२६ रोजी धुलिवंदनाच्या दिवशी गावालगत असलेल्या छोटू पाटील यांच्या शेतात त्यांचा मृतदेह छिन्नविछिन्न अवस्थेत आढळून आला.
मृतदेहाची ओळख राणुबाई यांचे भाऊ कृष्णा पवार यांनी त्यांच्या अंगावरील साडी आणि गळ्यातील मंगळसूत्रावरून पटवली. घटनेची माहिती मिळताच पोलिसांनी मृतदेह ताब्यात घेऊन शवविच्छेदनासाठी पाठविला. शवविच्छेदन अहवालातून राणुबाई यांचा खून झाल्याचे स्पष्ट झाले. त्यानंतर शहादा पोलिस ठाण्यात अज्ञात आरोपीविरुद्ध खुनाचा गुन्हा दाखल करण्यात आला होता.
असा झाला गुन्हा उघड
घटनेची गंभीर दखल घेत पोलिस अधीक्षक श्रवण दत्त एस., अपर पोलिस अधीक्षक अशित कांबळे, उपविभागीय पोलिस अधिकारी दत्ता पवार तसेच स्थानिक गुन्हे शाखेचे (एलसीबी) पोलिस निरीक्षक हेमंत पाटील यांनी घटनास्थळी भेट देऊन तपासाबाबत मार्गदर्शन केले.
या प्रकरणात सुरुवातीला कोणताही ठोस पुरावा मिळत नसल्याने तपासात अडचणी येत होत्या. मात्र पोलिसांनी सीडीआर विश्लेषण, विविध ठिकाणचे सीसीटीव्ही फुटेज तपासणे तसेच तांत्रिक विश्लेषण व गुप्त माहितीदारांच्या मदतीने तपासाची दिशा निश्चित केली.
तपासादरम्यान कहाटुळ येथील भिला लोटन माळी (वय ६५) याच्यावर संशय बळावला. पोलिसांनी त्याला ताब्यात घेऊन चौकशी केली असता त्याने गुन्ह्याची कबुली दिली. राणुबाई या सतत पैसे मागत असल्यामुळे संतापातून त्याने आधी त्यांच्या डोक्यात वार केला व नंतर गळा आवळून त्यांची हत्या केल्याचे त्याने सांगितले.
यांनी केला यशस्वी तपास
या प्रकरणाचा तपास स्थानिक गुन्हे शाखेचे पोलिस निरीक्षक हेमंत पाटील, शहादा पोलिस ठाण्याचे पोलिस निरीक्षक हेमंतकुमार पाटील, सहायक पोलिस निरीक्षक संदीप वाघ, एलसीबीचे उपनिरीक्षक विकास गुंजाळ, शहादाचे उपनिरीक्षक विनोद पाटील, पोलिस हवालदार देविदास विसपुते, योगेश थोरात, घनश्याम सूर्यवंशी, दीपक चौधरी, पोलिस शिपाई विकास शिरसाठ, भगवान सावळे, प्रदीप वाघ, भरत शिंपी, कपिल मंदिल, एलसीबीचे पोलिस हवालदार जितेंद्र पाडवी, मोहन ढमढेरे, दादाभाई वाघ, मुकेश तावडे, सचिन वसावे, विशाल नागरे, पोलिस नाईक विकास कापुरे, पोलिस शिपाई शोएब शेख, भरत उगले, सतीश घुले यांच्या पथकाने केला. त्यांच्या सातत्यपूर्ण तपासामुळे अखेर या खुनाच्या प्रकरणाचा उलगडा करण्यात पोलिसांना यश आले आहे.
