दौंड तालुका प्रतिनिधी -कानिफनाथ मांडगे
दौंड -पुरंदर तालुक्यात साकारत असलेल्या छत्रपती संभाजी महाराज आंतरराष्ट्रीय विमानतळ (Purandar International Airport) प्रकल्पामुळे संपूर्ण दौंड आणि पुरंदर तालुक्याच्या विकासाला अभूतपूर्व गती मिळणार आहे.
राज्य शासनाने या महत्त्वाकांक्षी प्रकल्पासाठी सुमारे ६ हजार कोटी रुपयांचे कर्ज मंजूर केले असून, सुमारे ९०० हेक्टर क्षेत्राच्या भूसंपादन प्रक्रियेला आता वेग आला आहे.जमिनींच्या भावात मोठी उसळी या प्रकल्पामुळे परिसरातील शेतजमिनींच्या बाजारभावात मोठी उसळी येण्याची शक्यता व्यक्त होत आहे. काही ठिकाणी जमिनीचा दर प्रतिएकर २ कोटी रुपयांपर्यंत जाऊ शकतो, अशी जोरदार चर्चा सध्या सुरू आहे. यामुळे अनेक वर्षे अल्पभावात असलेल्या जमिनी आता सोन्याच्या मोलाच्या ठरण्याची चिन्हे स्पष्ट दिसत आहेत.
खोर गाव विकासाच्या उंबरठ्यावर
दौंड तालुक्यातील खोर गाव हे विमानतळ हद्दीपासून अगदी जवळ असल्याने या प्रकल्पाचा सर्वाधिक सकारात्मक परिणाम येथे दिसून येणार आहे. एकेकाळी गुंतवणूकदारांनी पाठ फिरवलेल्या या जमिनींना आता मोठी मागणी वाढू लागली आहे. विमानतळ उभारणीमुळे खोर गावातील शेतकरी वर्गाच्या आर्थिक स्थितीत आमूलाग्र बदल घडून येणार आहे
