पनवेल प्रतिनिधी:- पनवेल पंचायत समिती वर ५० वर्षांची शेतकरी कामगार पक्षाची सत्ता उलथवून भाजप महायुतीने इतिहास घडवला आहे. पनवेल पंचायत समितीच्या सभापती पदी सौ. रंजना सदाशिव वास्कर आणि उपसभापती पदी श्री. भूपेंद्र सदानंद पाटील यांची बिनविरोध निवड करण्यात आली.
रायगड जिल्ह्यातील पंचायत समिती सभापती आणि उपसभापती निवडीच्या प्रक्रियेत पनवेल पंचायत समितीवर भारतीय जनता पक्षाने आपले निर्विवाद वर्चस्व सिद्ध केले आहे. पंचायत समितीच्या एकूण १६ जागांपैकी तब्बल १५ जागांवर भाजपने एकहाती विजय मिळवल्याने वर्षानुवर्षे येथे सत्ता असलेल्या शेतकरी कामगार पक्षाला (शेकाप) यावेळी पूर्णपणे सत्तेबाहेर राहावे लागले आहे.
सभापती पदी सौ.रंजना वास्कर आणि उपसभापती पदी श्री भूपेंद्र पाटील यांनी लोकनेते श्री रामशेठ ठाकूर यांच्या उपस्थितीत पनवेल पंचायत समिती कार्यालयात पदभार स्वीकारला.
लोकनेते माजी खासदार रामशेठ ठाकूर यांनीही यावेळी कार्यकर्त्यांना संबोधित केले. पनवेल पंचायत समितीत भाजपची सत्ता येण्यासाठी तब्बल २२ वर्षांचा काळ लागला असून या यशाचे श्रेय त्यांनी कार्यकर्त्यांच्या चिकाटीला आणि मेहनतीला दिले. आता भाजपची पूर्ण बहुमत असलेली सत्ता आल्याने पंचायत समितीच्या माध्यमातून होणाऱ्या विविध विकासकामांना खऱ्या अर्थाने वेग येईल, असा विश्वासही त्यांनी यावेळी व्यक्त केला.
या निवड प्रक्रियेवेळी आमदार प्रशांत ठाकूर, आमदार महेश बालदी, अरूणशेठ भगत, जिल्हाध्यक्ष अविनाश कोळी, परेश ठाकूर, प्रितम म्हात्रे आणि गणेश कडू यांच्यासह सर्व नवनिर्वाचित पंचायत समिती सदस्य आणि कार्यकर्ते मोठ्या संख्येने उपस्थित होते. नवनियुक्त सभापती आणि उपसभापतींचे मान्यवरांच्या हस्ते पुष्पगुच्छ देऊन अभिनंदन करण्यात आले.
