श्रीक्षेत्र माहूर : माहूर तालुक्यातील ग्रामपंचायतींच्या सरपंच पदासाठीचे आरक्षण मंगळवार, दि. २२ सप्टेंबर २०२६ रोजी दुपारी ३ वाजता तहसील कार्यालयातील वसंतराव नाईक सभागृहात सोडतीद्वारे जाहीर करण्यात आले.
उपविभागीय अधिकारी तथा सहाय्यक जिल्हाधिकारी बी. सरवरण यांच्या अध्यक्षतेखाली झालेल्या या कार्यक्रमास तहसीलदार अभिजित जगताप व नायब तहसीलदार कैलास जेठे यांची उपस्थिती होती. यावेळी पाच वर्षीय चिमुकली वसंतराव त्रिग्वेदा लाडे हिच्या हस्ते ईश्वरचिठ्ठीद्वारे बिगर अनुसूचित क्षेत्रातील ग्रामपंचायतींच्या सरपंच पदाच्या आरक्षणाची सोडत काढण्यात आली.
सोडतीमध्ये गुंडवळ, दत्तमांजरी आदी ग्रामपंचायतींसाठी नागरिकांचा प्रवर्ग महिला, तर मांडवा व शेकापूर यांच्यासाठी नागरिकांचा मागास प्रवर्ग अशा स्वरूपाचे आरक्षण जाहीर करण्यात आले. आसोली, लांजी, लखमापूर, कुपटी, लिंबायत, बोरवाडी व हडसणी या ग्रामपंचायतींसाठी सर्वसाधारण महिला प्रवर्गाचे आरक्षण जाहीर करण्यात आले.
तसेच पवनाळा, पापलवाडी, अनमाळ, तांदळा, रुई, मालवाडा व ईवळेश्वर या ग्रामपंचायतींसाठी सर्वसाधारण प्रवर्गाचे सरपंच पदाचे आरक्षण जाहीर करण्यात आले.
आरक्षण सोडतीच्या कार्यक्रमाला तालुक्यातील प्रतिष्ठित नागरिक, पत्रकार तसेच संबंधित ग्रामपंचायतींचे नागरिक उपस्थित होते. आरक्षण जाहीर झाल्यानंतर आगामी ग्रामपंचायत निवडणुकीच्या पार्श्वभूमीवर तालुक्यातील राजकीय हालचालींना वेग येण्याची शक्यता आहे.
कार्यक्रमाच्या शेवटी तहसीलदार अभिजित जगताप यांनी उपस्थितांचे आभार मानले.
