नितेश गट्टीवार चामोर्शी(गडचिरोली):दि.१२ मार्च चामोर्शी येथील जिल्हा परिषद उच्च प्राथमिक केंद्र शाळा येथे आदिवासी क्रांतिकारक शहीद वीर बाबुराव शेडमाके यांची जयंती आज दि.१२ मार्च रोजी उत्साहात व आदरपूर्वक साजरी करण्यात आली.
कार्यक्रमाच्या प्रारंभी शहीद वीर बाबुराव शेडमाके यांच्या प्रतिमेला पुष्पहार अर्पण करून अभिवादन करण्यात आले. या प्रसंगी चामोर्शी केंद्राचे केंद्रप्रमुख वरपडे , शाळेच्या मुख्याध्यापिका कोंडावार तसेच शाळेतील सर्व शिक्षक व विद्यार्थी उपस्थित होते.कार्यक्रमादरम्यान शाळेतील शिक्षक सिडाम यांनी वीर बाबुराव शेडमाके यांच्या जीवनप्रवासावर सविस्तर प्रकाश टाकला. त्यांनी ब्रिटिश सत्तेविरुद्ध केलेल्या शौर्यपूर्ण संघर्षाची माहिती विद्यार्थ्यांना दिली व त्यांच्या कार्यातून देशभक्ती, धैर्य आणि स्वाभिमानाचा संदेश मिळतो असे सांगितले. त्यांच्या मार्गदर्शनामुळे विद्यार्थ्यांसमोर इतिहास जणू जिवंत झाला.यानंतर केंद्रप्रमुख वरपडे यांनी गडचिरोली जिल्ह्याचे भूमिपुत्र असलेल्या शहीद वीर बाबुराव शेडमाके यांच्या क्रांतिकार्याची माहिती देत विद्यार्थ्यांना त्यांच्या कार्यातून प्रेरणा घेण्याचे आवाहन केले.
या कार्यक्रमातून विद्यार्थ्यांना आपल्या इतिहासातील महान क्रांतिकारकांच्या बलिदानाची जाणीव झाली आणि देशभक्तीची प्रेरणा मिळाली. कार्यक्रम उत्साहपूर्ण वातावरणात संपन्न झाला.
