पनवेल/ कळंबोली:(गणेश लाड) – चैत्र शुद्ध प्रतिपदा म्हणजेच ‘गुढीपाडवा’. सृष्टीतील चैतन्य जागवणारा आणि समृद्धीची गुढी उभारणारा हा सण भारतीय संस्कृतीत अत्यंत पवित्र मानला जातो. गुढीपाडवा व मराठी नववर्षाच्या स्वागतासाठी कळंबोली मध्ये भव्य शोभायात्रा उत्साहात पार पडली.
सकाळी आठ वाजता श्री गुढीचे पूजन करून शोभायात्रेला सुरुवात करण्यात आली.
महाराष्ट्र शाळेतील प्रांपरिक पेहरावात मुलींचे लेझिम पथक विशेष आकर्षण ठरले. शोभायात्रेत ढोल-ताशांचा कडकडाटाने वातावरण निनादून गेले होते. महिलांनी पारंपारिक नऊवारी साडी तर पुरुषांनी फेटा परिधान करून यात सहभाग घेतला आणि उत्साही सहभागामुळे संपूर्ण परिसर चैतन्यमय झाला होता. तरुण, महिला आणि लहान मुलांनी जल्लोषात गुढीपाडवा साजरा केला.कळंबोली मधील नागरिकांनी ठिकठिकाणी या शोभायात्रेचे जल्लोषात स्वागत केले.
या शोभा यात्रेमध्ये विविध चलचित्रांच्या माध्यमातून शाळेतील मुलांनी मराठी संस्कृतीचे दर्शन घडवले.
या शोभायात्रेत आमदार विक्रांत पाटील,महापौर श्री नितीन पाटील, उपमहापौर सौ.प्रमिला पाटील, स्थायी समिती सभापती श्री बबन मुकादम यांनी उपस्थित राहून कळंबोली वासियांना गुढीपाडवा व हिंदू नववर्ष च्य शुभेच्छा दिल्या. त्याच बरोबर या शोभा यात्रेमध्ये कळंबोली मधील सर्व नगरसेवक,सामाजिक, राजकीय, शैक्षणिक क्षेत्रातील अनेक मान्यवर उपस्थित होते.
आमदार श्री प्रशांत दादा ठाकूर हे केरळ दौऱ्यावर गेले असल्यामुळे ते उपस्थित राहू शकले नाहीत परंतु त्यांनी कळंबोली वासियांना गुढीपाडवा व हिंदू नववर्ष च्य शुभेच्छा दिल्या असल्याची माहिती महापौर श्री नितीन पाटील यांनी दिली.
गुढीपाडवा सांस्कृतिक व सामाजिक सेवा संस्था, कळंबोली यांच्या कडून या शोभायात्रेचे भव्य दिव्य अशा शोभायात्रेचे आयोजन करण्यात आले होते. उपस्थित राहिलेल्या सर्वांचे आयोजकांकडून आभार मानण्यात आले.
