खर्डी प्रतिनिधी :-
शहापूर तालुक्यातील खर्डी येथे नागरिकांच्या आरोग्याच्या दृष्टीने तालुका स्तरीय महा आरोग्य शिबिराचे आयोजन करण्यात आले आहे. महाराष्ट्र शासनाचा आरोग्य विभाग, जिल्हा परिषद ठाणे आणि पंचायत समिती शहापूर यांच्या संयुक्त विद्यमाने हे शिबिर आयोजित करण्यात येत आहे.
हे शिबिर मंगळवार, दि. २५ मार्च २०२६ रोजी सकाळी १०.०० ते दुपारी २.०० या वेळेत ग्रामीण रुग्णालय, खर्डी (ता. शहापूर, जि. ठाणे) येथे पार पडणार आहे. सदर शिबिराचे आयोजन प्राथमिक आरोग्य केंद्र टेंभा यांच्या मार्फत करण्यात येत असून नाव नोंदणी प्रक्रिया सुरू असल्याची माहिती देण्यात आली आहे.
तालुका आरोग्य अधिकारी डॉ. भाग्यश्री सोनपिंपळे तसेच प्राथमिक आरोग्य केंद्र टेंभा येथील वैद्यकीय अधिकारी डॉ. रमेश नामदेवराव राठोड यांनी नागरिकांनी वेळेत नोंदणी करून शिबिराचा लाभ घ्यावा, असे आवाहन केले आहे.
या महा आरोग्य शिबिरामध्ये नागरिकांना मोफत आरोग्य तपासणी व उपचार सुविधा उपलब्ध करून दिल्या जाणार असून, विविध तज्ज्ञ डॉक्टरांकडून खालील विभागांमध्ये सेवा दिली जाणार आहे:
- सर्वसाधारण तपासणी: उच्च रक्तदाब, मधुमेह, छातीत दुखणे, डोकेदुखी
- कान-नाक-घसा (ENT): कानाचे विकार, सर्दी, घशाचे आजार
- सर्जरी मार्गदर्शन: हर्निया, हायड्रोसील, अपेंडिक्स
- स्त्रीरोग विभाग: गर्भधारणा व महिलांचे आजार
- बालरोग विभाग: लहान मुलांची तपासणी
- मानसोपचार: मानसिक आजार, डिप्रेशन, व्यसनमुक्ती समुपदेशन
- अस्थिरोग: हाडे, सांधे व मणक्याचे विकार
- त्वचारोग: सर्व प्रकारचे त्वचेचे आजार
- नेत्ररोग: डोळ्यांची तपासणी व मोतीबिंदू उपचार
तसेच, आवश्यक असलेल्या रुग्णांना पुढील उपचारासाठी योग्य मार्गदर्शन करण्यात येणार आहे.
खर्डी व परिसरातील नागरिकांनी मोठ्या संख्येने उपस्थित राहून या मोफत महा आरोग्य शिबिराचा लाभ घ्यावा, असे आवाहन आरोग्य विभागाकडून करण्यात आले आहे.
