सेलू
सेलू–नागपूर महामार्गावरील जंगलापुर नजिक मजुरांना घेऊन जाणारा टँक्टर पलटी झाल्याची गंभीर घटना रविवारी (दि. २२ मार्च) दुपारी सुमारे १ वाजताच्या सुमारास घडली. या अपघातात एकूण आठ मजूर जखमी झाले असून त्यापैकी पाच जणांची प्रकृती गंभीर असल्याची माहिती समोर आली आहे.
मिळालेल्या माहितीनुसार, सेलूकडून नागपूरकडे वीज वितरण कंपनीचे साहित्य (इलेक्ट्रिक पोल) घेऊन जाणारा टँक्टर (क्रमांक एमएच 32 पी 1999) जंगलापुर परिसरात चालकाचे नियंत्रण सुटल्याने रस्त्यावर पलटी झाला. टँक्टरमध्ये मजूर बसलेले असल्याने अपघातात सर्व मजूर जखमी झाले.
टँक्टरमध्ये मोठ्या प्रमाणात इलेक्ट्रिक पोल असल्यामुळे अपघाताची तीव्रता वाढली आणि पाच जण गंभीर जखमी झाले. जखमींमध्ये राहुल बागडी (वय १८), निर्मल बागडी (वय २१), राणी बागडी (वय १७), बलराम बागडी (वय १७) आणि अमित बागडी (वय २१, सर्व रा. कोलकाता) यांचा समावेश आहे.
घटनेची माहिती मिळताच रुग्णमित्र प्रज्वल लटारे यांनी तत्काळ घटनास्थळी धाव घेत जखमींना रुग्णवाहिकेद्वारे सेवाग्राम येथील रुग्णालयात उपचारासाठी दाखल केले.
या अपघातामुळे परिसरात काही काळ तणावाचे वातावरण निर्माण झाले होते. दरम्यान, प्रशासनाने या घटनेची दखल घेऊन अपघाताच्या कारणांचा तपास सुरू केला आहे.
