सेलू प्रतिनिधी 🖊️
जागतिक महिला दिन तसेच Savitribai Phule यांच्या स्मृती दिनानिमित्त सेलू येथे भव्य महिला आरोग्य शिबिर व ‘आशा’ सेविका सन्मान सोहळा मोठ्या उत्साहात पार पडला. उत्कर्षा जनकल्याण शिक्षण संस्था, वर्धा सोशल फोरम आणि Kasturba Hospital Sevagram यांच्या संयुक्त विद्यमाने रविवार, दि. २२ मार्च २०२६ रोजी स्थानिक दीपचंद विद्यालयात कार्यक्रमाचे आयोजन करण्यात आले होते.
या कार्यक्रमाचे अध्यक्षपद दीपचंद विद्यालयाचे अध्यक्ष नवीन चौधरी यांनी भूषविले. प्रमुख पाहुणे म्हणून नगर पंचायतीचे सभापती शैलेंद्र दफ्तरी, माजी उपाध्यक्ष चुडामण हांडे, प्राचार्या सौ. मकरंदे तसेच महाराष्ट्र प्रदेश काँग्रेस कमिटीचे सचिव व वर्धा सोशल फोरमचे अध्यक्ष Abhyuday Meghe उपस्थित होते.
या उपक्रमांतर्गत आयोजित शिबिरात परिसरातील शेकडो महिलांची तज्ज्ञ डॉक्टरांकडून मोफत आरोग्य तपासणी करण्यात आली. ग्रामीण व शहरी भागात आरोग्य सेवा तळागाळापर्यंत पोहोचवण्यात महत्त्वाची भूमिका बजावणाऱ्या ‘आशा’ सेविकांचा यावेळी सन्मान चिन्ह देऊन गौरव करण्यात आला.
यावेळी मान्यवरांनी आपल्या भाषणात ‘आशा’ सेविकांचे कार्य समाजासाठी प्रेरणादायी असल्याचे सांगत महिलांच्या आरोग्याबाबत जनजागृती करण्याची गरज अधोरेखित केली.
सकाळी ९ ते दुपारी १ या वेळेत पार पडलेल्या या शिबिरात कस्तुरबा रुग्णालय सेवाग्राम येथील वैद्यकीय पथकाने तपासणी केली. हा उपक्रम यशस्वी करण्यासाठी श्याम परसोडकर, ज्योती सुर्वे तसेच उत्कर्षा जनकल्याण शिक्षण संस्था व वर्धा सोशल फोरमच्या सदस्यांनी विशेष परिश्रम घेतले.
या शिबिराचा सेलू शहर व परिसरातील महिलांनी मोठ्या संख्येने लाभ घेतला असून, उपक्रमाचे सर्वत्र कौतुक होत आहे.
