कळंबोली (ता.प्रतिनिधी)- मराठी चित्रपट रसिकांसाठी एक आनंदाची बातमी आहे. चंद्रशेखर सांडवे प्रतिष्ठानतर्फे आयोजित २८ वा ‘सांस्कृतिक कलादर्पण मराठी चित्रपट महोत्सव’ २ आणि ३ एप्रिल २०२६ रोजी कळंबोली येथे आयोजित करण्यात आला आहे. या महोत्सवात प्रेक्षकांना केवळ ५० रुपयांत दर्जेदार मराठी चित्रपट पाहण्याची संधी मिळणार आहे. कळंबोली येथील सुधागड शिक्षण संस्थेच्या माध्यमिक विद्यालयाच्या सभागृहात, नामवंत कलाकारांच्या उपस्थितीत हा महोत्सव पार पडणार आहे.
‘कलादर्पण’चे अध्यक्ष चंद्रशेखर सांडवे यांनी या महोत्सवाची घोषणा केली. यावेळी त्यांनी सांगितले की, या महोत्सवाच्या आयोजनात ‘कांतीलाल प्रतिष्ठान रायगड’चे अध्यक्ष कांतीलाल कडू यांचे विशेष सहकार्य लाभले आहे.
मराठी चित्रपट दिग्दर्शक, तंत्रज्ञ आणि उदयोन्मुख कलाकारांना एक योग्य व्यासपीठ उपलब्ध करून देण्याच्या उद्देशाने, चंद्रशेखर सांडवे प्रतिष्ठानच्या माध्यमातून गेल्या २८ वर्षांपासून हा महोत्सव सातत्याने आयोजित केला जात आहे. मराठी चित्रपटसृष्टीला अधिक बळकट आणि समृद्ध करण्यात हा महोत्सव महत्त्वाची भूमिका बजावत आहे.
या महोत्सवाचे उद्घाटन गुरुवारी (२ एप्रिल) सकाळी १०.३० वाजता अभिनेते अरुण नलावडे यांच्या हस्ते होणार आहे.
या दोन दिवसीय महोत्सवादरम्यान ‘आदिशेष’, ‘फुला’, ‘गुलकंद’, ‘भेरा’, ‘अमायरा’, ‘कुर्ला टू वेंगुर्ला’, ‘रीलस्टार’, ‘जय भीम पँथर’, ‘एप्रिल मे १९’ आणि ‘छबी’ यांसारखे दहा दर्जेदार मराठी चित्रपट प्रदर्शित केले जातील.
‘सांस्कृतिक कलादर्पण २०२६’ मराठी लघुपट महोत्सवातील अंतिम फेरीतील लघुपटांचा पारितोषिक वितरण समारंभही २ एप्रिल रोजी याच महोत्सवाच्या अंतर्गत पार पडणार आहे.
सर्वोत्कृष्ट लघुपट: सकाव, वाट, सातबारा, साथ; लक्षवेधी लघुपट: पत्रावळ, स्वाभिमान ध्यास शिक्षणाचा, अत्तर; सर्वोत्कृष्ट दिग्दर्शक: अक्षय वास्कर (सकाव, सातबारा), गिरीश कोरवे (वाट), अविनाश राऊत (साथ). सर्वोत्कृष्ट कथा: नीरजा कृष्णा (सकाव),
गिरीश कोरवे (वट), अक्षय वास्कर (सातबारा), अविनाश राऊत (साथ), रामकुमार शेडगे (अत्तर); सर्वोत्कृष्ट अभिनेता: सौरभ चौगुले, पिंटू पाटील, सुनील पाटेकर, राहुल बर्डे; सर्वोत्कृष्ट अभिनेत्री: प्रतिमा कृष्णा, शीतल रेडकर, सुवर्णा लाड, अक्षता आचरेकर. सहाय्यक कलाकार आणि तांत्रिक श्रेणींमध्येही विविध नामांकने जाहीर करण्यात आली आहेत.
लघुपट पुरस्कार वितरण समारंभ २ एप्रिल रोजी सकाळी १०.३० वाजता पार पडेल. या महोत्सवाची सांगता ३ एप्रिल रोजी रात्री ९ वाजता ‘छबी’ या चित्रपटाने होईल.
दरम्यान, आयोजक चंद्रशेखर सांडवे यांनी अधिकाधिक प्रेक्षकांनी माफक दरात दर्जेदार मराठी चित्रपट पाहण्याच्या या संधीचा लाभ घ्यावा, असे आवाहन केले आहे.
