शहादा, दि.२२ (प्रतिनिधी) :
नंदुरबार आणि धुळे जिल्ह्यातील बेरोजगार तरुण-तरुणींसाठी मोठी संधी उपलब्ध झाली असून शहादा येथे भव्य जिल्हास्तरीय संयुक्त भोईसमाज रोजगार मेळाव्याचे आयोजन करण्यात आले आहे. शुक्रवार, २७ मार्च रोजी मोहिदा रोडवरील शासकीय औद्योगिक प्रशिक्षण संस्था येथे सकाळी १० ते सायंकाळी ५ या वेळेत हा मेळावा पार पडणार आहे.
या मेळाव्याचे प्रमुख आकर्षण म्हणजे नामांकित कंपन्यांचा सहभाग. Haier, LG, Hyundai, JCB, Fiat, Tata Group आणि Coca-Cola यांसारख्या ३० हून अधिक कंपन्यांचे प्रतिनिधी उपस्थित राहून उमेदवारांच्या प्रत्यक्ष मुलाखती घेणार आहेत.
हा रोजगार मेळावा कौशल्य विकास रोजगार व उद्योजकता मार्गदर्शन केंद्र (नंदुरबार), भोईसमाज कल्याणकारी मंच, जनसेवा फाउंडेशन आणि स्व. विपुल खेडकर सामाजिक व शैक्षणिक फाउंडेशन यांच्या संयुक्त विद्यमाने आयोजित करण्यात आला आहे.
कार्यक्रमाचे उद्घाटन मंगेश वाघ यांच्या हस्ते होणार असून प्रमुख पाहुणे म्हणून महेबुब भाई सैयद, बालाजी आळंदीकर, सुपडू खेडकर यांच्यासह विशाल उवाळे, स्वास्तिक जाधव आणि राकेश पाटील उपस्थित राहणार आहेत.
या मेळाव्यात १० वी, १२ वी उत्तीर्ण, आयटीआय, पदवीधर व पदविकाधारक उमेदवारांना करिअर मार्गदर्शन आणि नोकरीच्या संधी मिळणार आहेत. इच्छुकांनी आपला बायोडाटा (CV) आणि आवश्यक कागदपत्रांसह उपस्थित राहावे, असे आवाहन प्रा. महेंद्र खेडकर यांनी केले आहे.
या उपक्रमामुळे ग्रामीण भागातील तरुणांना रोजगाराच्या नव्या संधी उपलब्ध होणार असून परिसरात उत्साहाचे वातावरण निर्माण झाले आहे.
