भडगाव प्रतिनिधी:
भडगाव तालुक्यातील बोदर्डे येथील श्रीराम मंदिरात श्री रामनवमीच्या पावन निमित्ताने भव्य कीर्तन सप्ताहाचे आयोजन करण्यात आले आहे. हा सप्ताह चैत्र शुद्ध २, शुक्रवार दिनांक २० मार्च २०२६ ते चैत्र शुद्ध ९, दिनांक २७ मार्च २०२६ या कालावधीत भक्तिभावाने पार पडणार आहे.
या सप्ताहात ह.भ.प. शैलाताई महाराज, ह.भ.प. ज्योतीताई महाराज, ह.भ.प. स्नेहलताई महाराज, सुदर्शन महाराज, ह.भ.प. वृषाप्रियाताई महाराज, ह.भ.प. सुनीताताई महाराज, ह.भ.प. विशाल महाराज तसेच ह.भ.प. सावता महाराज यांच्या कीर्तन सेवेने वातावरण भक्तिमय होणार असून सप्ताहाची सांगता करण्यात येणार आहे.
दररोज सकाळी ५ ते ६ या वेळेत काकड आरती होणार असून दुपारी २ ते ५ या वेळेत संगीतमय रामायण कथा सादर केली जाणार आहे. ही रामायण कथा ह.भ.प. गोपाल महाराज दोनगावकर यांच्या वाणीने सादर होणार आहे.
रामायण कथेचे दातृत्व राधाकृष्ण महिला मंडळ, बोदर्डे यांनी घेतले असून अखंड हरिनाम सप्ताहातील महाप्रसादासाठी राजेंद्र अभिमान पाटील यांनी सहकार्य केले आहे. तसेच या कीर्तन सप्ताहाचे आयोजन समस्त बोदर्डे ग्रामस्थांनी केले असून पत्रिकेसाठी बोदर्डे दूध उत्पादक सोसायटीचे सहकार्य लाभले आहे.
या धार्मिक सोहळ्यास भाविकांनी मोठ्या संख्येने उपस्थित राहून लाभ घ्यावा, असे आवाहन आयोजकांकडून करण्यात आले आहे.
