पालघर प्रतिनिधी:
शिक्षण म्हणजे केवळ पुस्तकी ज्ञान नसून प्रत्यक्ष अनुभवातून मिळणारे शिक्षण अधिक प्रभावी आणि कायमस्वरूपी लक्षात राहणारे असते. याच उद्देशाने स्पार्क फाउंडेशन, ठाणे यांच्या सहकार्याने जिल्हा परिषद ISO शाळा, कोचाळे येथील विद्यार्थ्यांसाठी एक दिवसीय शैक्षणिक सहलीचे आयोजन करण्यात आले.
या सहलीत इयत्ता पाचवी ते आठवीच्या सुमारे ४० विद्यार्थ्यांसह ४ शिक्षक, ८ पालक आणि शाळा व्यवस्थापन समितीचे सदस्य सहभागी झाले होते. या अभ्यासपूर्ण सहलीत विद्यार्थ्यांनी ऐतिहासिक, धार्मिक आणि वैज्ञानिक स्थळांचा प्रत्यक्ष अनुभव घेतला.
सहलीदरम्यान विद्यार्थ्यांनी नाशिक येथील प्रसिद्ध जैन मंदिराला भेट देऊन भगवान महावीर यांच्या सुंदर कोरीव मूर्तीचे दर्शन घेतले तसेच गोशाळेची पाहणी केली. त्यानंतर पांडव लेणी येथे प्राचीन शिलालेख, गुहा आणि भगवान गौतम बुद्ध यांच्या दगडात कोरलेल्या मूर्तींचा अभ्यास केला.
यानंतर विद्यार्थ्यांनी नेहरू तारांगण येथे विज्ञाननिष्ठ शो पाहिला. या शोमधून सूर्यमाला, ग्रह-तारे, त्यांची निर्मिती आणि उपग्रह याबाबत प्रत्यक्ष अनुभव घेत विद्यार्थ्यांच्या वैज्ञानिक दृष्टिकोनाला चालना मिळाली.
पुढे पेरूची वाडी येथे विविध प्राणी-पक्ष्यांचे निरीक्षण करण्यात आले. ससे, रंगबिरंगी पक्षी, शहामृग, मोठे सरडे, काश्मिरी बकरी यांसारख्या विविध प्रजातींचा विद्यार्थ्यांनी जवळून अनुभव घेतला. तसेच अस्सल पेरूपासून बनवलेल्या आईस्क्रीमचा आस्वाद घेत मुलांनी सहलीचा आनंद लुटला.
शेवटी नाशिक येथील प्रसिद्ध काळाराम मंदिराला भेट देऊन धार्मिक अनुभवही घेतला.
अशा प्रकारे ऐतिहासिक, धार्मिक आणि वैज्ञानिक अनुभवांची त्रिवेणी असलेली ही सहल स्पार्क फाउंडेशनच्या सहकार्याने यशस्वीरीत्या पार पडली. या उपक्रमामुळे विद्यार्थ्यांच्या सर्वांगीण विकासाला चालना मिळाल्याचे मत शिक्षक व पालकांनी व्यक्त केले.
