नांदगाव खंडेश्वर :
घरगुती गॅस सिलिंडरच्या वाढत्या दरांमुळे आणि कृत्रिम टंचाईच्या विरोधात नांदगाव खंडेश्वर येथे काँग्रेस पक्षाच्या वतीने अनोखे प्रतीकात्मक आंदोलन करण्यात आले. या आंदोलनामुळे परिसरात राजकीय वातावरण तापले असून नागरिकांचेही लक्ष वेधले गेले.
आंदोलनादरम्यान कार्यकर्त्यांनी नाल्याच्या काठावर प्रतीकात्मक आंदोलन करत केंद्र सरकारच्या धोरणांचा निषेध व्यक्त केला. यावेळी पंतप्रधान नरेंद्र मोदी यांनी पूर्वी केलेल्या गटारातील गॅसबाबतच्या वक्तव्याचा उल्लेख करत, सध्याच्या गॅस दरवाढीवर टीका करण्यात आली. “दरवाढ आणि टंचाईमुळे सामान्य नागरिक त्रस्त झाले आहेत,” अशी भावना आंदोलकांनी व्यक्त केली.
या आंदोलनावेळी काँग्रेस कार्यकर्त्यांनी जोरदार घोषणाबाजी करत सरकारविरोधात निषेध नोंदवला.
या आंदोलनाचे नेतृत्व महाराष्ट्र प्रदेश युवक काँग्रेसचे महासचिव परीक्षित जगताप, युवक काँग्रेस तालुका अध्यक्ष दीपक संजयराव भगत, शहर काँग्रेस अध्यक्ष अमोल धवसे यांनी केले. तसेच युवक काँग्रेस उपाध्यक्ष मंगेश जोगे, मोहम्मद रियाजभाई सैयद, मोफिक, अतुल ठाकूर, रमेश ठाकरे, राजेंद्र पारधी, पवन कारेकर, सुशील थोरात, समीर दहातोडे, प्रमोद इझळकर, प्रदीप बामनवाडे, रणजित मेश्राम, पंकज जगणे, तन्वीरभाई जमीरभाई, अजय मोहिते, अबुजरभाई शेख, रईस शेख, नादर कंझरा, धनराज वानखडे, विठोबाजी सातपुते, विनायत खान पठाण, किसनराव इगोले, अयाज काळेकर, ऋषभ काळेकर यांच्यासह काँग्रेसचे अनेक पदाधिकारी उपस्थित होते.
सदर आंदोलनाद्वारे गॅस दरवाढ तात्काळ कमी करावी व कृत्रिम टंचाई दूर करावी, अशी मागणी काँग्रेसच्या वतीने करण्यात आली.
