भडगाव (प्रतिनिधी) : महाराष्ट्र अंधश्रद्धा निर्मूलन समिती, भडगाव शाखेच्या वतीने नाशिक येथील भोंदू बाबा अशोक खरात प्रकरणी कठोर व त्वरित कारवाई करण्याची मागणी करत तहसीलदार व पोलीस निरीक्षक भडगाव यांना निवेदन देण्यात आले.
नाशिकमधील या प्रकरणाने संपूर्ण महाराष्ट्राला हादरवून सोडले असून, हे प्रकरण केवळ एका व्यक्तीपुरते मर्यादित नसून सत्ता, संपत्ती, लैंगिक शोषण आणि बुवाबाजी यांचे धोकादायक संगनमत असल्याचे निवेदनात नमूद करण्यात आले. समाजातील भीती व अडचणींचा गैरफायदा घेत तथाकथित अध्यात्म व ज्योतिषाच्या नावाखाली महिलांचे व सर्वसामान्यांचे शोषण होत असल्याचा गंभीर आरोप करण्यात आला.
अशा प्रकारच्या बुवाबाजीमागे सामाजिक मान्यता, आर्थिक स्वार्थ तसेच राजकीय व प्रशासकीय स्तरावरील संरक्षण असल्याची शक्यता व्यक्त करत या प्रकरणाचा व्यापक व निपक्ष तपास करण्याची मागणी करण्यात आली. तसेच अंधश्रद्धा विरोधी कायद्याची प्रभावी अंमलबजावणी करून पीडित महिलांना संरक्षण देण्याचीही मागणी निवेदनात करण्यात आली आहे.
या निवेदनावेळी जिल्हा प्रधान सचिव प्रा. डॉ. दीपक मराठे, शाखाध्यक्ष यूनुस खान, प्रा. डॉ. दिनेश तांदळे, प्रा. डॉ. अतुल देशमुख, प्रा. एल. जी. कांबळे, एस. डी. पाटील, पत्रकार जावेद शेख, फिरोज मनियार, स्वप्निल सोनार, सुभोध पाटील, गोकुळ चौधरी, नागेश वाघ, डॉ. विकास पाटील, ज्येष्ठ नागरिक अनिल पवार, गुलाबराव जाधव आदी कार्यकर्ते उपस्थित होते.
