श्रीगोंदा (प्रतिनिधी): श्रीगोंदा तालुक्यातील चांभुर्डी गावातील ढगेवाडी येथे असलेल्या मारुती (हनुमंतराय) मंदिर येथे गेल्या १६ वर्षांपासून सुरू असलेला अखंड हरिनाम सप्ताह यंदाही उत्साहात आयोजित करण्यात आला आहे. आयोजकांच्या माहितीनुसार, हा सप्ताह दिनांक २६ मार्च २०२६ ते २ एप्रिल २०२६ या कालावधीत पार पडणार आहे.
सप्ताहादरम्यान दररोज नामस्मरण, भजन, कीर्तन आणि प्रवचनांचा कार्यक्रम आयोजित करण्यात आला असून विविध कीर्तनकार आपले कीर्तन सादर करणार आहेत. दिनांक २६ मार्च रोजी ह.भ.प. शामसुंदर महाराज ढवळे यांचे कीर्तन होणार असून २७ मार्च रोजी ह.भ.प. पंडित महाराज टकले, २८ मार्च रोजी ह.भ.प. अक्षय महाराज उगले, २९ मार्च रोजी ह.भ.प. पांडुरंग महाराज गिरी, ३० मार्च रोजी ह.भ.प. भाऊसाहेब महाराज पन्हाळकर, ३१ मार्च रोजी ह.भ.प. इंद्रजीत महाराज नवले यांचे कीर्तन होणार आहे.
तसेच १ एप्रिल रोजी ह.भ.प. मधुकर महाराज वांगणे यांचे कीर्तन होईल, तर २ एप्रिल रोजी ह.भ.प. राजेंद्र महाराज कुऱ्हे यांच्या काल्याच्या कीर्तनाने सप्ताहाची सांगता होणार आहे.
या सप्ताहात विविध गावांतील भजनी मंडळी दररोज हरिजागर सादर करणार असून संपूर्ण सप्ताह काळात वेगवेगळ्या महाराजांचे प्रवचन होणार आहे. विशेष म्हणजे, दिनांक १ एप्रिल रोजी ग्रंथराज ज्ञानेश्वरी दिंडी प्रदक्षिणा काढण्यात येणार आहे.
या धार्मिक सोहळ्यासाठी अनेक अन्नदाते पुढाकार घेत असून अन्नदानाची व्यवस्था करण्यात आली आहे. तसेच ग्रामस्थ, तरुण मंडळे आणि भजनी मंडळे मोठ्या उत्साहाने सहभाग नोंदवत आहेत.
या पार्श्वभूमीवर आयोजकांनी जास्तीत जास्त भाविकांनी उपस्थित राहून या धार्मिक उत्सवाचा लाभ घ्यावा, असे आवाहन केले आहे.
