मानवत (प्रतिनिधी) : नेताजी सुभाष माध्यमिक व उच्च माध्यमिक विद्यालय, मानवत येथील कलाशिक्षक ज्ञानेश्वर सूर्यभान कौसाईतकर यांना राज्यस्तरीय आदर्श कलाध्यापक पुरस्कार – २०२६ जाहीर झाला आहे. हा पुरस्कार महाराष्ट्र राज्य कलाध्यापक संघ महामंडळ, पुणे यांच्या वतीने प्रदान करण्यात येतो.
सदर पुरस्काराला महाराष्ट्र शासन तसेच महाराष्ट्र राज्य शैक्षणिक संशोधन व प्रशिक्षण परिषद, पुणे यांची मान्यता प्राप्त आहे. शैक्षणिक, सामाजिक, संघटनात्मक आणि कलात्मक क्षेत्रातील उत्कृष्ट कार्याची दखल घेऊन जिल्हा संघाच्या शिफारशींनुसार कौसाईतकर यांची निवड करण्यात आली आहे.
या यशामुळे मानवत तालुका व परभणी जिल्ह्याचा शैक्षणिक क्षेत्रात मान उंचावला आहे. कौसाईतकर यांनी विद्यार्थ्यांमध्ये कलाविषयाची आवड निर्माण करून अनेक उपक्रम राबविले असून त्यांच्या कार्याची राज्यस्तरावर दखल घेण्यात आली आहे.
दरम्यान, पुरस्कार वितरण समारंभ दिनांक २८ व २९ मार्च २०२६ रोजी सातारा येथील स्व. यशवंतराव चव्हाण बहुउद्देशीय सभागृह, जिल्हा परिषद येथे मान्यवरांच्या हस्ते पार पडणार आहे. या कार्यक्रमात कला शिक्षण परिषद (कार्यशाळा) देखील आयोजित करण्यात आली आहे.
पुरस्कार स्वीकारण्यासाठी निवड झालेल्या कलाशिक्षकांनी उपस्थित राहावे, असे आवाहन आयोजकांच्या वतीने करण्यात आले आहे.
👉 या यशाबद्दल ज्ञानेश्वर सूर्यभान कौसाईतकर यांचे सर्व स्तरांतून अभिनंदन करण्यात येत आहे.
