नांदेड (प्रतिनिधी) : अवैध गुटखा, पानमसाला व सुगंधित तंबाखूजन्य पदार्थांविरोधात हिमायतनगर पोलिसांनी मोठी कारवाई करत तब्बल ४ लाख ८८ हजार ३०० रुपयांचा मुद्देमाल जप्त केला आहे. या प्रकरणी एका आरोपीविरुद्ध गुन्हा दाखल करण्यात आला असून परिसरात खळबळ उडाली आहे.
मिळालेल्या माहितीनुसार, दि. २३ मार्च २०२६ रोजी रात्री सुमारे ९.२० वाजता पोलिसांना गोपनीय माहिती मिळाली की, शेवाळ बाबा वाळीत परिसरात अवैध गुटखा व पानमसाल्याची साठवणूक करून विक्री सुरू आहे. या माहितीच्या आधारे पोलिसांनी सापळा रचून छापा टाकला.
या कारवाईत सैय्यद सत्तार सैय्यद खालिद (वय ४८, रा. पोटा बु., ता. हिमायतनगर, जि. नांदेड) याच्या ताब्यात मोठ्या प्रमाणात गुटखा व पानमसाल्याचा साठा आढळून आला. पोलिसांनी त्याला ताब्यात घेत ४,८८,३०० रुपयांचा मुद्देमाल जप्त केला.
जप्त करण्यात आलेल्या मुद्देमालामध्ये ‘गोवा १०००’ पानमसाला, केसरयुक्त वज्री, जी.आय. जर्दा, विविध ब्रँडचे पानमसाले, सुगंधित तंबाखू तसेच “मस्तानी २१६” व इतर प्रीमियम दर्जाचे तंबाखू उत्पादने यांचा समावेश आहे.
या प्रकरणी हिमायतनगर पोलीस ठाण्यात गु.र.क्र. ५२/२५ नुसार भारतीय दंड संहिता कलम १२३, २७४, २७५ तसेच इतर संबंधित कायद्यांनुसार गुन्हा दाखल करण्यात आला असून गुन्ह्याची नोंद दि. २४ मार्च २०२६ रोजी पहाटे करण्यात आली.
ही कारवाई पोलीस अधीक्षक अविनाश कुमार यांच्या मार्गदर्शनाखाली करण्यात आली. तसेच पोलीस निरीक्षक अमोल भगत, सपोनि विशाल वाठारे, पोहवा क्र. १२७२, चालक श्रेणी पोउपनि मिलिंद कात्रे, श्याम नागरगोजे, पोहवा क्र. २२०४ बालाजी पाटील, मपोशि क्र. ३३३१ सपना सूर्यवंशी आदींच्या पथकाने छाप्यात सहभाग घेतला.
पोलिसांनी दिलेल्या माहितीनुसार, राज्यात गुटखा व पानमसाल्यावर बंदी असतानाही काही ठिकाणी अवैधरित्या साठवणूक व विक्री सुरू असल्याने अशा प्रकरणांवर आळा घालण्यासाठी विशेष मोहिम राबविण्यात येत आहे. पुढील काळातही अशाच धडक कारवाया सुरू राहणार असल्याचे पोलिसांनी स्पष्ट केले.
दरम्यान, नागरिकांनी अवैध धंद्यांची माहिती मिळाल्यास त्वरित पोलिसांना कळवून सहकार्य करावे, असे आवाहन प्रशासनाकडून करण्यात आले आहे.
