३० मार्चपूर्वी कर भरा, अन्यथा जप्ती मोहीम तीव्र – मुख्याधिकारी मुगाजी काकडे
नांदेड (प्रतिनिधी) : किनवट नगर परिषद प्रशासनाने थकबाकीदारांविरुद्ध कठोर पावले उचलत शहरातील दोन व्यावसायिक गाळे सील केले. वारंवार सूचना देऊनही कर भरणा न करणाऱ्या मालमत्ता धारक, गाळेभाडे, जमीन भाडे तसेच पाणीपट्टी थकबाकीदारांविरुद्ध ही कारवाई करण्यात आली असून शहरात मोठी खळबळ उडाली आहे.
नगर परिषद किनवट सध्या ‘ॲक्शन मोड’वर असून, जमीन भाडे, गाळे भाडे, मालमत्ता कर आणि पाणीपट्टीचा भरणा न करणाऱ्यांविरुद्ध व्यापक मोहीम राबवली जात आहे. आर्थिक वर्ष संपण्यास अवघे काही दिवस शिल्लक असल्याने प्रशासनाने वसुलीसाठी आक्रमक भूमिका घेतली आहे.
दि. २४ मार्च रोजी राबविण्यात आलेल्या विशेष मोहिमेत शहरातील दोन मोठ्या थकबाकीदारांचे व्यावसायिक गाळे जप्त करून त्यांना सील ठोकण्यात आले. या कारवाईमुळे इतर थकबाकीदारांमध्येही भीतीचे वातावरण निर्माण झाले आहे.
या संदर्भात मुख्याधिकारी मुगाजी काकडे यांनी स्पष्ट केले की, “नागरिकांनी कटू कारवाई टाळण्यासाठी ३० मार्च २०२६ पूर्वी आपल्या थकीत पाणीपट्टी, मालमत्ता कर, गाळे भाडे आणि जमीन भाड्याचा भरणा करावा. मुदतीत कर न भरल्यास संबंधितांची मालमत्ता जप्त करण्याची मोहीम आणखी तीव्र केली जाईल.”
या धडक कारवाईत नगर परिषदेचे कर विभाग प्रमुख घुले, संमुखराव, स्वानंद मामीलवाड, कैतवाड, राजू पिल्लेवार, परमेश्वर कचमोडे, अनिल माहूरकर, गंगाधर दोनपेलीवार यांच्यासह नगर परिषदेचे कर्मचारी व पथक सहभागी होते.
आगामी आठवड्यात ही वसुली मोहीम शहरातील विविध भागांत अधिक तीव्रतेने राबवली जाणार आहे. जप्तीची नामुष्की टाळण्यासाठी नागरिकांनी आजच थकीत कर भरून नगर परिषदेला सहकार्य करावे, असे आवाहन प्रशासनाने केले आहे.
