पंढरपूर (प्रतिनिधी) : पंढरपूर–कुर्डूवाडी रोडवर आढीवजवळील पवार मळा येथे मोटारसायकल व बोलेरो गाडीचा भीषण अपघात होऊन एका व्यक्तीचा जागीच मृत्यू झाल्याची घटना घडली आहे.
मिळालेल्या माहितीनुसार, महेश कांबळे (वय ३८, रा. तावशी) हे मोटारसायकलने कुर्डूवाडीहून पंढरपूरकडे जात असताना मागून आलेल्या बोलेरो वाहनाने जोरदार धडक दिली. या अपघातात ते गंभीर जखमी होऊन जागीच मृत्यूमुखी पडले.
अपघातातील बोलेरो वाहन क्रमांक MH 10 BA 9106 असून मोटारसायकल क्रमांक MH 13 CF 6438 असा आहे. धडकेची तीव्रता इतकी होती की, मोटारसायकलस्वाराला बचावाची संधीही मिळाली नाही.
घटनेची माहिती मिळताच पंढरपूर ग्रामीण पोलीस ठाण्याचे अधिकारी वाडदेकर घटनास्थळी दाखल झाले. त्यांनी पंचनामा करून मृतदेह पंढरपूर येथील रुग्णालयात शवविच्छेदनासाठी पाठवला.
या अपघातामुळे परिसरात हळहळ व्यक्त होत असून पुढील तपास पोलीस करत आहेत.
