भोकर (बातमीदार): शहरात पेट्रोल व डिझेल टंचाईची अफवा पसरताच नागरिकांमध्ये मोठी घबराट निर्माण झाली असून, पेट्रोल पंपांवर वाहनधारकांच्या लांबच लांब रांगा लागल्याचे चित्र आज पाहायला मिळाले.
सकाळी सहा वाजल्यापासूनच दुचाकी आणि चारचाकी वाहनांनी पेट्रोल पंप परिसर गजबजून गेला होता. अनेक ठिकाणी पंपाबाहेर रस्त्यापर्यंत रांगा लागल्याने मुख्य रस्त्यांवर वाहतुकीची कोंडी निर्माण झाली. सोशल मीडियावर इंधन पुरवठा खंडित होणार असल्याची अफवा वेगाने पसरल्याने ही परिस्थिती निर्माण झाल्याचे समजते.
गर्दी नियंत्रणात ठेवण्यासाठी काही पेट्रोल पंपांवर प्रति वाहन केवळ २०० ते ५०० रुपयांपर्यंतच इंधन देण्यात येत होते. यामुळे नागरिकांमध्ये अस्वस्थता वाढली. विशेषतः शेतीकामांचा हंगाम सुरू असल्याने ट्रॅक्टरसाठी डिझेल मिळवण्यासाठी शेतकऱ्यांची मोठी तारांबळ उडाली.
दरम्यान, प्रशासनाने स्पष्ट केले आहे की इंधनाचा पुरेसा साठा उपलब्ध असून कोणतीही टंचाई नाही. नागरिकांनी अफवांवर विश्वास न ठेवता संयम राखावा, असे आवाहन करण्यात आले आहे.
तासनतास रांगेत उभे राहावे लागल्यामुळे नोकरदार वर्ग व विद्यार्थ्यांचे मोठ्या प्रमाणात हाल झाले. काही नागरिकांनी भविष्यातील भीतीपोटी बाटल्या व कॅनमध्ये पेट्रोल साठवण्याचाही प्रयत्न केल्याचे दिसून आले.
