उमरखेड (प्रतिनिधी): आगामी सण-उत्सवांच्या पार्श्वभूमीवर बिटरगाव पोलीस स्टेशनकडून सार्वजनिक शांतता व सुव्यवस्था राखण्यासाठी महत्त्वपूर्ण निर्णय घेण्यात आला आहे. मिरवणुकांमध्ये डीजे लावण्यास पूर्णतः बंदी घालण्यात आली असून नियमांचे उल्लंघन करणाऱ्यांवर कठोर कारवाईचा इशारा देण्यात आला आहे.
बिटरगाव पोलीस स्टेशनचे ठाणेदार पांडुरंग शिंदे यांनी स्पष्ट केले की, डीजेच्या कर्णकर्कश आवाजामुळे वृद्ध, लहान मुले तसेच आजारी नागरिकांना त्रास सहन करावा लागतो. अनेकदा यामुळे वादाची परिस्थितीही निर्माण होते. त्यामुळे ध्वनी प्रदूषण रोखण्यासाठी आणि शांतता टिकवण्यासाठी हा निर्णय घेण्यात आला आहे.
पोलीस प्रशासनाने सण-उत्सव शांततेत व उत्साहात साजरे करण्याचे आवाहन करत पारंपरिक वाद्यांचा वापर करण्यास प्रोत्साहन दिले आहे. “सण-उत्सव साजरे करताना नियमांचे पालन करणे ही सर्वांची जबाबदारी आहे. डीजे लावल्यास संबंधित मंडळ आणि डीजे मालकावर कायदेशीर कारवाई केली जाईल,” असा इशारा देण्यात आला आहे.
बिटरगाव पोलीस स्टेशनच्या कार्यक्षेत्रातील सर्व गावांमध्ये हा आदेश लागू असून नागरिकांनी प्रशासनाला सहकार्य करावे, असे आवाहन करण्यात आले आहे.
