वर्धा (प्रतिनिधी): जिल्हाधिकारी कार्यालय वर्धा तसेच अन्न नागरी पुरवठा व ग्राहक संरक्षण विभाग, वर्धा यांच्या वतीने जागतिक ग्राहक दिनानिमित्त विशेष कार्यक्रमाचे आयोजन करण्यात आले. सेवाग्राम रोड येथील जिल्हा समाजकल्याण सभागृहात दि. २४ मार्च २०२६ रोजी दुपारी १२ वाजता हा कार्यक्रम पार पडला.
कार्यक्रमाची सुरुवात Swami Vivekananda यांच्या प्रतिमेला पुष्पहार अर्पण करून करण्यात आली. यावेळी न्यायाधीश श्रीमती वैशाली आर. गजभिये (अध्यक्ष, जिल्हा ग्राहक तक्रार निवारण मंच, वर्धा) तसेच राजू रणवीर (उपजिल्हाधिकारी तथा जिल्हा पुरवठा अधिकारी) यांनी अभिवादन केले.
या कार्यक्रमाला विवेक देशमुख (सचिव, जिल्हा विधी सेवा प्राधिकरण तथा दिवाणी न्यायाधीश वरिष्ठ स्तर), किशोर मुटे (विदर्भ प्रांत कार्यकारिणी सदस्य), ॲड. विभा देशमुख (विधी सल्लागार, अखिल भारतीय ग्राहक परिषद), विनोद पोटे (सचिव, अखिल भारतीय ग्राहक परिषद वर्धा), सौ. उषा फाले (अध्यक्ष, अखिल भारतीय ग्राहक कल्याण परिषद) तसेच अजय भोयर (सचिव, विदर्भ शाखा) आदी मान्यवरांची उपस्थिती होती.
यानंतर वैधमापन विभाग वर्धा यांच्या हस्ते कार्यक्रमाचे उद्घाटन करण्यात आले. या कार्यक्रमाद्वारे ग्राहक हक्क, संरक्षण आणि जागरूकतेबाबत मार्गदर्शन करण्यात आले. नागरिकांनी सजग ग्राहक बनून आपल्या हक्कांची जाणीव ठेवावी, असे आवाहन यावेळी करण्यात आले.
