चोपडा (प्रतिनिधी): महात्मा गांधी शिक्षण मंडळ संचलित श्रीमती शरच्चद्रिका सुरेश पाटील इन्स्टिट्यूट ऑफ टेक्नॉलॉजी (इंजिनिअरिंग व पॉलिटेक्निक), चोपडा येथे “अविष्कार २K२६” हा भव्य सांस्कृतिक महोत्सव दि. २४ व २५ मार्च २०२६ रोजी उत्साहात आणि जल्लोषात पार पडला. ढोल-ताशांच्या गजरात काढण्यात आलेल्या भव्य शोभायात्रेने कार्यक्रमाची रंगतदार सुरुवात झाली.
महोत्सवात ट्रॅडिशनल डे, मिस-मॅच डे, रॅम्प वॉक, बॉलीवूड डे, रांगोळी स्पर्धा, गीत गायन, वन मिनिट शो, नाट्य, नृत्य आणि मिमिक्री अशा विविध आकर्षक स्पर्धांचे आयोजन करण्यात आले होते. या सर्व उपक्रमांमध्ये विद्यार्थ्यांनी उत्स्फूर्त सहभाग घेत आपल्या कलागुणांचे उत्कृष्ट सादरीकरण केले.
कार्यक्रमाचे उद्घाटन संस्थेच्या सचिव डॉ. स्मिता संदीप पाटील यांच्या हस्ते करण्यात आले. बक्षीस वितरण सोहळ्यास प्रा. गौरव महाले प्रमुख अतिथी म्हणून उपस्थित होते. त्यांनी विद्यार्थ्यांच्या कला व कौशल्याचे कौतुक करत मार्गदर्शन केले. यावेळी तंत्र शिक्षण समितीचे सदस्य डॉ. हनुमंतराव सूर्यवंशी यांचीही उपस्थिती होती.
महाविद्यालयाचे प्राचार्य प्रा. व्ही. एन. बोरसे यांनी विद्यार्थ्यांना शैक्षणिक प्रगतीसोबतच सांस्कृतिक उपक्रमांमधून व्यक्तिमत्त्व विकास करण्याचे महत्त्व पटवून दिले. कार्यक्रमाचे सूत्रसंचालन मोहिनी पाटील व सुजाता पाटील यांनी केले, तर मुख्य समन्वयक म्हणून प्रा. पी. के. चौधरी यांनी जबाबदारी यशस्वीरीत्या पार पाडली.
महोत्सवातील विविध स्पर्धांमध्ये उत्कृष्ट कामगिरी करणाऱ्या विद्यार्थ्यांना मान्यवरांच्या हस्ते गौरविण्यात आले. “अविष्कार २K२६” मुळे विद्यार्थ्यांच्या सर्जनशीलतेला वाव मिळून महाविद्यालयात उत्साह व एकात्मतेचे वातावरण निर्माण झाले.
