कन्नड (प्रतिनिधी): तालुक्यातील कन्नड शहरालगत मकरंदपुर (डांगरा) येथील उड्डाण पुलाखाली शिवना नदी पात्रात असलेल्या स्वयंभू पुरातन महादेव पिंडीवर Shivanand Maharaj यांनी ४१ दिवसांच्या कठोर तपश्चर्येला सुरुवात केली आहे. या धार्मिक उपक्रमामुळे परिसरात भक्तीमय वातावरण निर्माण झाले असून भाविकांची मोठी गर्दी होत आहे.
माहितीनुसार, ही महादेव पिंड अत्यंत पुरातन असून ती स्वयंभू मानली जाते. कुंभमेळ्यादरम्यान महाराजांना या ठिकाणाचे स्वप्न पडल्याचे सांगितले जाते. त्या आधारे ते शिवना नदी पात्रात आले आणि येथे तपश्चर्या सुरू केली.
विशेष म्हणजे कडक उन्हाळ्याच्या पार्श्वभूमीवरही महाराज केवळ लंगोट परिधान करून कोणत्याही सावलीशिवाय उघड्यावर तप करत आहेत. ही तपश्चर्या चैत्र शुक्ल पक्ष गुरुवार दि. १९ मार्च २०२६ पासून सुरू झाली असून वैशाख शुक्ल पक्ष मंगळवार दि. २९ एप्रिल २०२६ पर्यंत चालणार आहे.
या तपश्चर्येच्या समाप्तीनिमित्त महाप्रसादाचे आयोजन करण्यात आले असून सर्व भाविकांनी उपस्थित राहून लाभ घ्यावा, असे आवाहन सरपंच विनायक सोनवणे, पोपट लोंढे, यमा भाऊ, तैयब शहा व इतर ग्रामस्थांच्या वतीने करण्यात आले आहे.
