आजरा (प्रतिनिधी) : राष्ट्रीय बाल स्वास्थ्य कार्यक्रम (RBSK) अंतर्गत आजरा ग्रामीण रुग्णालयात आयोजित विशेष शस्त्रक्रिया शिबिरात एकूण १० बालकांवर यशस्वी शस्त्रक्रिया करण्यात आल्या. या उपक्रमामुळे तालुक्यातील अनेक बालकांना आरोग्यदायी जीवनाची नवी संधी मिळाली आहे.
तालुक्यातील अंगणवाडी तसेच शालेय बालकांची आर.बी.एस.के. पथकांमार्फत सखोल आरोग्य तपासणी करण्यात आली होती. या तपासणीत शस्त्रक्रियेस पात्र ठरलेल्या बालकांसाठी दि. २५ मार्च २०२६ रोजी आजरा ग्रामीण रुग्णालयात विशेष शस्त्रक्रिया शिबिर आयोजित करण्यात आले.
या शिबिरात २ बालकांवर जिभेखालील बंध (टंग टाय) तसेच ८ बालकांवर शिश्नचर्म संबंधित शस्त्रक्रिया करण्यात आल्या. सर्व शस्त्रक्रिया शस्त्रक्रिया तज्ज्ञ डॉ. सुनील अभिवंत यांनी कौशल्यपूर्णरीत्या पार पाडल्या. भूलतज्ज्ञ म्हणून डॉ. ज्योती कोले यांनी जबाबदारी सांभाळली, तर वैद्यकीय अधीक्षक डॉ. अमोल पाटील यांचे मार्गदर्शन लाभले.
शिबिराच्या यशस्वी आयोजनासाठी डॉ. सुरजित पांडव, डॉ. स्वाती रेडेकर, डॉ. दरवाजकर, डॉ. मंदिरा सातवेकर यांच्यासह वैद्यकीय अधिकारी, परिचारिका व कर्मचारी यांनी विशेष परिश्रम घेतले.
या उपक्रमामुळे ग्रामीण भागातील बालकांना मोफत व दर्जेदार आरोग्य सेवा उपलब्ध होत असून, पालकांकडूनही समाधान व्यक्त करण्यात आले आहे.
