सेलसुरा, ता. वर्धा प्रतिनिधी : कृषि विज्ञान केंद्र, सेलसुरा येथे ‘शेतीदिन’ व चारा केंद्र प्रक्षेत्र भेट कार्यक्रम उत्साहपूर्ण वातावरणात पार पडला. जिल्हा परिषद वर्धा यांच्या जिल्हा नियोजन अंतर्गत राबविण्यात येत असलेल्या ‘चारा केंद्र विकसित करणे’ या प्रकल्पांतर्गत कृविके सेलसुरा येथे चारा प्रक्षेत्र विकसित करण्यात आले आहे.
या प्रक्षेत्रावर विविध चारा पिकांसह हायब्रीड नेपियर गवताची लागवड करण्यात आली असून येथून शेतकरी व पशुपालकांना चारा बेण्याचे वाटपही सुरू आहे. शेतकऱ्यांना चारा पिकांची लागवड, व्यवस्थापन, खत व्यवस्थापन व कापणी याबाबत प्रत्यक्ष माहिती मिळावी, यासाठी या प्रक्षेत्र भेट कार्यक्रमाचे आयोजन करण्यात आले होते.
कार्यक्रमाचे मार्गदर्शन कृविकेचे प्रमुख डॉ. जीवन कतोरे यांच्या नेतृत्वाखाली झाले. यावेळी विषय विशेषज्ञ डॉ. सचिन मुळे (पशुसंवर्धन व दुग्धशास्त्र) यांनी चारा पिकांच्या विविध जाती व त्यांची लागवड याबाबत सविस्तर माहिती दिली. डॉ. निलेश वझीरे (पिकसंरक्षण) यांनी चारा पिकांमध्ये नैसर्गिक पद्धतीने खत व रोग व्यवस्थापनाविषयी मार्गदर्शन केले. तसेच डॉ. भारती तिजारे (कृषिविद्या) यांनी चारा पिकांची लागवड व कापणी यावर माहिती दिली.
यावेळी दिघी येथील प्रगतशील शेतकरी आशिष दिघीकर यांनी एकात्मिक पशुधन आधारित शेती व पूरक व्यवसायाबाबत अनुभव कथन करत मार्गदर्शन केले.
या कार्यक्रमास वर्धा जिल्ह्यातील शेतकरी व पशुपालक मोठ्या संख्येने उपस्थित होते. प्रक्षेत्र भेटीदरम्यान शेतकऱ्यांनी चारा पिकांची प्रत्यक्ष पाहणी करून येत्या खरीप हंगामात चारा लागवड वाढविण्याचा संकल्प व्यक्त केला.
