सेलू (तालुका प्रतिनिधी) : अंमली पदार्थांची विक्री व तस्करी रोखण्यासाठी स्थानिक गुन्हे शाखा, वर्धा यांनी धडक कारवाई करत दोन आरोपींना रंगेहात पकडले असून त्यांच्याकडून ५६,५०० रुपयांचा मुद्देमाल जप्त करण्यात आला आहे.
पोलीस अधीक्षक सौरभ कुमार अग्रवाल यांनी अंमली पदार्थ बाळगणारे व विक्री करणाऱ्यांवर कठोर कारवाई करण्याचे आदेश दिल्यानंतर स्थानिक गुन्हे शाखेने विशेष मोहीम राबविली. त्यानुसार दि. २४ मार्च २०२६ रोजी पेट्रोलिंगदरम्यान मिळालेल्या गोपनीय माहितीच्या आधारे सेलू पोलीस ठाणे हद्दीतील मौजा हिंगणी, वार्ड क्र. १ येथे छापा टाकण्यात आला.
या कारवाईदरम्यान गिताबाई हरिभाऊ चुटके आणि तिचा नातजावई रौशन कुमार उर्फ रोशनसिंग तुलसी सहाणी (रा. अमृत कॉलनी, लुधियाना, पंजाब; सध्या हिंगणी) हे गांजा विक्री करताना रंगेहात आढळले. पोलिसांनी त्यांच्या ताब्यातून १ किलो ६० ग्रॅम गांजा व एक मोबाईल असा एकूण ५६,५०० रुपयांचा मुद्देमाल जप्त केला.
तपासादरम्यान हा गांजा गणेशनगर, सातगाव (बुट्टीबोरी) येथील मधु गुजरकर नावाच्या व्यक्तीकडून मिळाल्याचे निष्पन्न झाले आहे. या प्रकरणी तिन्ही आरोपींविरुद्ध सेलू पोलीस ठाण्यात एनडीपीएस कायद्यान्वये गुन्हा नोंद करण्यात आला आहे.
ही कारवाई पोलीस अधीक्षक सौरभ कुमार अग्रवाल, अपर पोलीस अधीक्षक सदाशिव वाघमारे यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद चौधरी, सहायक पोलीस निरीक्षक आशिषसिंग ठाकुर, पोलीस उपनिरीक्षक प्रकाश लसुंते तसेच कर्मचारी अरविंद येनुरकर, रोशन निंबोळकर, रवि पुरोहित, अभिषेक नाईक, प्रिती धवळे यांच्या पथकाने केली.
