रिसोड (प्रतिनिधी) : शहरातील पेट्रोलपंपांवर अचानक तुफान गर्दी उसळल्याचे चित्र पाहायला मिळत आहे. उन्हातान्हात नागरिकांनी भल्या मोठ्या रांगा लावत पेट्रोल-डिझेल भरण्यासाठी गर्दी केल्याने पंपचालक व कर्मचाऱ्यांची मोठी तारांबळ उडाली आहे.
सध्या इंधन टंचाईच्या अफवा पसरत असल्यामुळे नागरिक भीतीपोटी पेट्रोल-डिझेलचा साठा करत असल्याचे दिसून येत आहे. त्यामुळे अनेक ठिकाणी अनावश्यक गर्दी निर्माण झाली आहे.
दरम्यान, जिल्हा प्रशासनाने स्पष्ट केले आहे की, जिल्ह्यात पेट्रोल, डिझेल तसेच घरगुती एलपीजी गॅसचा पुरेसा साठा उपलब्ध असून कोणतीही तुटवडा परिस्थिती निर्माण झालेली नाही. इंधन पुरवठा सुरळीत ठेवण्यासाठी आवश्यक त्या सर्व उपाययोजना करण्यात आल्या आहेत.
नागरिकांनी अफवांवर विश्वास न ठेवता संयम व जबाबदारीने वागावे, घाबरून जास्त प्रमाणात इंधन खरेदी करू नये, तसेच आवश्यकतेनुसारच इंधन खरेदी करून प्रशासनाला सहकार्य करावे, असे आवाहन जिल्हाधिकाऱ्यांकडून करण्यात आले आहे.
दरम्यान, आंतरराष्ट्रीय घडामोडी आणि संभाव्य निर्बंधांविषयीच्या चर्चांमुळे नागरिकांमध्ये संभ्रमाचे वातावरण निर्माण झाले असून काही ठिकाणी पुन्हा लॉकडाऊन लागणार का, अशीही शंका व्यक्त होत आहे. याच पार्श्वभूमीवर नागरिकांनी पेट्रोलपंपांवर गर्दी केल्याचे चित्र समोर आले आहे.
