करमाळा प्रतिनिधी : करमाळा तालुक्यातील फिरगाईनगर (दुधाट फ्लोटिंग परिसर) येथे अज्ञात चोरट्यांनी बंद घर फोडून सुमारे ७० हजार रुपयांचा ऐवज लंपास केल्याची घटना उघडकीस आली आहे. याप्रकरणी करमाळा पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे.
मिळालेल्या माहितीनुसार, तुषार अमोल जाधव (वय २१, रा. सिद्धार्थनगर, करमाळा) यांनी दिलेल्या फिर्यादीत नमूद केले आहे की, फिरगाईनगर येथे त्यांचे रो-हाऊस असून कुटुंबीय अधूनमधून तेथे राहत असतात. घरात जुनी पितळेची भांडी तसेच साखरपुड्यासाठी खरेदी केलेले कपडे ठेवण्यात आले होते.
दि. २४ मार्च रोजी दुपारी तक्रारदारांचे नातेवाईक वैभव शेलार हे संबंधित घराकडे गेले असता, घराच्या पुढील दरवाज्याचा कडी-कोयंडा तुटलेला दिसून आला. त्यांनी तत्काळ याबाबत तक्रारदारांना माहिती दिली. तक्रारदारांनी घटनास्थळी जाऊन पाहणी केली असता घरफोडी झाल्याचे स्पष्ट झाले. शेजाऱ्यांकडून चौकशी केली असता मागील दोन दिवसांपासून घराचा मागील दरवाजा उघडा असल्याची माहिती समोर आली.
या घरफोडीत सुमारे ४५ हजार रुपये किमतीचे कपडे (साड्या, शर्ट पीस, पॅंट पीस), १५ हजार रुपये किमतीची पितळेची भांडी (पाण्याचा बंब, डिनर सेट, घागर, कळशी आदी) तसेच १० हजार रुपये किमतीचा एलईडी टीव्ही असा एकूण सुमारे ७० हजार रुपयांचा ऐवज चोरीस गेला आहे.
ही घटना दि. २१ मार्च रोजी रात्री ८ वाजल्यापासून ते दि. २४ मार्च रोजी दुपारी ३ वाजेपर्यंतच्या कालावधीत घडल्याचा अंदाज व्यक्त करण्यात येत आहे. अज्ञात चोरट्यांनी दरवाजा तोडून घरात प्रवेश करून ही घरफोडी केली आहे.
या प्रकरणी पोलीस निरीक्षक रणजीत माने यांच्या मार्गदर्शनाखाली पुढील तपास सुरू असून, परिसरात वाढत्या घरफोडीच्या घटनांमुळे नागरिकांमध्ये भीतीचे वातावरण निर्माण झाले आहे.
