दौंड (प्रतिनिधी) : चौफुला येथील नवीनगाव बोरिपार्धी परिसरात श्री राम प्रतिष्ठान मंडळाच्या वतीने भगवान श्रीरामांचा जन्मोत्सव मोठ्या उत्साहात व भक्तीभावाने साजरा करण्यात आला. या निमित्ताने संपूर्ण परिसरात धार्मिक व आनंदमय वातावरण निर्माण झाले होते.
राम नवमीच्या पावन दिवशी सकाळपासूनच मंदिरात विविध धार्मिक कार्यक्रमांचे आयोजन करण्यात आले होते. अभिषेक, पूजन, श्रीराम फेरी तसेच भजन-कीर्तनाच्या कार्यक्रमांनी उत्सवाला सुरुवात झाली. भाविकांनी मोठ्या श्रद्धेने या कार्यक्रमात सहभाग घेतला.
दुपारी साडे बारा वाजता श्रीरामांच्या जन्मक्षणाचे औचित्य साधून मंदिरात विशेष आरती करण्यात आली. यावेळी उपस्थित भाविकांनी “जय श्रीराम”च्या घोषणांनी संपूर्ण परिसर दुमदुमून टाकला. भक्तांच्या उत्स्फूर्त सहभागामुळे मंदिर परिसरात भक्तीमय वातावरण निर्माण झाले होते.
कार्यक्रमानंतर महाप्रसादाचे आयोजन करण्यात आले होते. गावातील तसेच परिसरातील अनेक भाविकांनी मोठ्या संख्येने उपस्थित राहून महाप्रसादाचा लाभ घेतला.
या कार्यक्रमाचे आयोजन व नियोजन यशस्वी करण्यासाठी मंडळाचे आधारस्तंभ विलास बापू कोळपे यांनी विशेष परिश्रम घेतले. त्यांनी उपस्थित सर्व भाविकांचे आभार मानले. या भक्तिमय उत्सवामुळे परिसरात आनंदाचे वातावरण निर्माण झाले असून सर्वत्र समाधान व्यक्त करण्यात येत आहे.
