करमाळा (प्रतिनिधी) : सण-उत्सवांमध्ये डीजेचा वाढता वापर आणि कर्णकर्कश आवाज ही जणू परंपरा बनत असताना, करमाळा शहराने एक वेगळा आणि प्रेरणादायी आदर्श घालून दिला आहे. सकल हिंदू समाजाच्या वतीने डीजेचा पूर्णतः त्याग करत पारंपरिक ढोल-ताशांच्या नादात भव्य मिरवणूक काढण्यात आली.
‘जय श्रीराम’च्या घोषणांनी संपूर्ण शहर दुमदुमून गेले होते. ढोल-ताशांच्या तालावर भक्ती, संस्कृती आणि शिस्त यांचा सुंदर संगम पाहायला मिळाला. कोणताही गोंगाट न करता मिरवणूक शिस्तबद्ध व उत्साहपूर्ण वातावरणात पार पडली, हे विशेष ठरले.
या उपक्रमामुळे ध्वनीप्रदूषणावर नियंत्रण ठेवण्यास मदत झाली असून, पारंपरिक वाद्यांच्या माध्यमातून सण साजरे करण्याचा सकारात्मक संदेश समाजापर्यंत पोहोचला. लहान मुलांपासून युवक आणि ज्येष्ठ नागरिकांपर्यंत सर्वांनी मोठ्या उत्साहात सहभाग घेतला.
नागरिकांनी या उपक्रमाचे जोरदार स्वागत करत “असाच सण हवा” अशी भावना व्यक्त केली. डीजेच्या गोंगाटापेक्षा संस्कृतीची जपणूक आणि पर्यावरणपूरक सण साजरे करण्याचा संदेश देणारा हा उपक्रम करमाळ्यासाठी अभिमानास्पद ठरला आहे.
भविष्यातही अशाच पद्धतीने सण-उत्सव साजरे करण्याचा निर्धार व्यक्त करण्यात आला असून, करमाळ्यातून राज्यभरासाठी एक सकारात्मक आदर्श निर्माण झाला आहे.
