उदगीर (प्रतिनिधी) : उन्नत भारत अभियानाच्या अंतर्गत मौजे हैबतपूर येथे महिला आरोग्य जनजागृती अभियान व सॅनिटरी नॅपकिन्स वितरण कार्यक्रम शनिवार, दि. २८ मार्च २०२६ रोजी यशस्वीरित्या पार पडला. हा उपक्रम Maharashtra Animal and Fishery Sciences University अंतर्गत मत्स्यविज्ञान महाविद्यालय, उदगीर यांच्या संयुक्त विद्यमाने आयोजित करण्यात आला होता.
या कार्यक्रमाअंतर्गत गावातील सुमारे १०० महिलांना घरोघरी भेट देऊन आरोग्य, स्वच्छता, मासिक पाळी व्यवस्थापन तसेच पोषण याविषयी सविस्तर मार्गदर्शन करण्यात आले. महिलांमध्ये स्वच्छतेबाबत जागरूकता वाढविण्याच्या उद्देशाने सॅनिटरी नॅपकिन्सचे वितरणही करण्यात आले.
कार्यक्रमात डॉ. सोमनाथ यादव (प्राध्यापक), डॉ. संतोष कुंजीर व डॉ. मिलिंद गिरकर (सहयोगी प्राध्यापक), डॉ. जयश्री मठपती व डॉ. सागर सातकर (अतिथी व्याख्याते) यांनी सक्रिय सहभाग घेतला. तसेच महाविद्यालयातील अंतिम वर्षातील विद्यार्थ्यांनी उत्साहाने सहभाग नोंदवत कार्यक्रमाच्या यशस्वीतेत मोलाचे योगदान दिले.
या उपक्रमामुळे ग्रामीण भागातील महिलांमध्ये आरोग्य व स्वच्छतेबाबत जागरूकता वाढण्यास मोठी मदत झाली असून, उन्नत भारत अभियानाच्या उद्दिष्टांना पूरक अशी ही प्रभावी जनजागृती मोहीम ठरली आहे. कार्यक्रमाचे समन्वय डॉ. सोमनाथ यादव यांनी केले.
