प्रतिनिधी : गंगाखेड तालुक्यातील इसाद येथील इम्रान जाफर शेख (वय १९) यांची छत्रपती संभाजीनगर येथे लोहमार्ग पोलीस पदावर निवड झाली असून, त्यांच्या या यशामुळे कुटुंबासह संपूर्ण परिसरात आनंदाचे वातावरण निर्माण झाले आहे.
अत्यंत सामान्य कुटुंबातून येणाऱ्या इम्रान यांनी लहानपणापासूनच शिक्षणासोबत स्पर्धा परीक्षांची तयारी सुरू ठेवली. मर्यादित साधनसामग्री असूनही त्यांनी हार न मानता सातत्याने परिश्रम घेतले. दिवस-रात्र मेहनत, शिस्तबद्ध अभ्यास आणि आत्मविश्वास यांच्या बळावर त्यांनी हे यश संपादन केले.
विशेष म्हणजे, इम्रान यांनी कोणत्याही खासगी क्लासेसवर अवलंबून न राहता स्वतःच्या जिद्दीच्या जोरावर अभ्यास केला. कठीण परिस्थितीतही ध्येयावर लक्ष केंद्रित ठेवत त्यांनी अभ्यासाची गती कायम राखली आणि यश मिळवले.
त्यांच्या या यशामुळे गावातील इतर तरुणांमध्येही स्पर्धा परीक्षांविषयी नवचैतन्य निर्माण झाले आहे. “परिस्थिती काहीही असली तरी मेहनत आणि आत्मविश्वासाच्या जोरावर यश मिळवता येते,” हे त्यांनी कृतीतून दाखवून दिले आहे.
इम्रान जाफर शेख यांच्या निवडीबद्दल नातेवाईक, मित्रपरिवार व ग्रामस्थांकडून त्यांचे अभिनंदन होत असून, त्यांच्या पुढील वाटचालीसाठी शुभेच्छांचा वर्षाव होत आहे. त्यांच्या चुलते पो. ना. शेख रसूल यांनीही सत्कार करून त्यांना शुभेच्छा दिल्या.
