जालना | प्रतिनिधी :
जालना तालुक्यातील पुणेगाव येथील पारधी समाजातील महिला मारहाण प्रकरणात दोषींवर कठोर कारवाई करण्याच्या मागणीसाठी वंचित बहुजन आघाडीच्या वतीने डी.वाय.एस.पी अनंत कुलकर्णी यांच्या कार्यालयासमोर भव्य निदर्शने आंदोलन करण्यात आले.
सदर प्रकरणात संबंधित महिलेला जातीय द्वेषातून वागणूक देण्यात आल्याचा आरोप असून, तालुका पोलिस ठाण्याचे पोलिस निरीक्षक संतोष साबळे यांनी तिचा जबाब नोंदवून न घेतल्याचा आरोपही करण्यात आला. यामुळे संतप्त झालेल्या कार्यकर्त्यांनी संबंधितांवर तातडीने कठोर कारवाई करण्याची मागणी केली.
या आंदोलनाचे नेतृत्व वंचित बहुजन आघाडीचे मराठवाडा उपाध्यक्ष दिपक डोके यांनी केले. यावेळी जिल्हा संघटक राजेंद्र खरात, महिला जिल्हाध्यक्षा रमाताई होर्शिळ, सम्यक विद्यार्थी आंदोलनाचे जिल्हाध्यक्ष सुरज सोनोवने, जेष्ठ नेते विष्णुकुमार शेळके, तालुकाध्यक्ष भानुदास साळवे, अंबड तालुकाध्यक्ष किशोर तुपे यांच्यासह अनेक पदाधिकारी व कार्यकर्ते उपस्थित होते.
तसेच पारधी समाजातील महिला व बांधव मोठ्या संख्येने या आंदोलनात सहभागी झाले होते. प्रशासनाने या प्रकरणाची गांभीर्याने दखल घेऊन दोषींवर तातडीने कारवाई करावी, अशी जोरदार मागणी यावेळी करण्यात आली.
