कन्नड | प्रतिनिधी :
अहिल्याबाई होळकर तीर्थक्षेत्र विकास योजनेंतर्गत कन्नड तालुक्यातील देवगावरंगारी आणि त्रिकूटेश्वर देवस्थान, वासडी या तीर्थक्षेत्रांसाठी एकूण ४ कोटी ५० लाख रुपयांचा निधी मंजूर करण्यात आला आहे.
ग्रामविकास मंत्री जयकुमार गोरे यांच्या माध्यमातून, भाजप जिल्हाध्यक्ष डॉ. संजय खंबायते यांच्या प्रयत्नातून तसेच जिल्हा परिषद सदस्य संजय गव्हाणे यांच्या सातत्यपूर्ण पाठपुराव्यामुळे हा निधी मंजूर झाला आहे. यामध्ये देवगावरंगारीसाठी २ कोटी ४० लाख, तर वासडी येथील देवस्थानासाठी २ कोटी १० लाख रुपयांचा समावेश आहे.
ही दोन्ही तीर्थक्षेत्रे ‘ब’ वर्ग गटात येत असून, मंजूर निधीमुळे येथील विकासकामांना गती मिळणार आहे.
या निर्णयामुळे परिसरातील गावकऱ्यांमध्ये आनंदाचे वातावरण निर्माण झाले असून, संबंधित लोकप्रतिनिधींचे आभार व्यक्त करण्यात येत आहेत.
