राज्यात तृतीय क्रमांक; १५० दिवसांच्या डिजिटल सुधारणा मोहिमेत अकोला पोलीस दलाची दमदार कामगिरी
मुंबई / अकोला : महाराष्ट्र शासनाच्या ई-गव्हर्नन्स सुधारणा कार्यक्रमात अकोला पोलीस अधीक्षक कार्यालयाने उल्लेखनीय कामगिरी करत राज्यात आपला ठसा उमटवला आहे. या भव्य यशाबद्दल अकोला जिल्ह्याचे पोलीस अधीक्षक श्री. अर्चित चांडक यांचा सन्मान राज्याचे मुख्यमंत्री देवेंद्र फडणवीस (Devendra Fadnavis) यांच्या हस्ते प्रशस्तिपत्र देऊन करण्यात आला.
१५० दिवसांचा ई-गव्हर्नन्स कार्यक्रम ठरला गेमचेंजर
महाराष्ट्र शासनातर्फे राबविण्यात आलेल्या १५० दिवसांच्या विशेष मोहिमेत राज्यभरातील शासकीय कार्यालयांमध्ये डिजिटल सेवा प्रभावीपणे राबविण्यावर भर देण्यात आला. या मोहिमेत अकोला पोलीस दलाने अत्याधुनिक तंत्रज्ञानाचा प्रभावी वापर करून उत्कृष्ट कामगिरी नोंदवली.
सात निकषांवर अव्वल कामगिरी
या स्पर्धेत खालील सात महत्त्वाच्या निकषांवर मूल्यांकन करण्यात आले:
▪️कार्यालयाचे संकेतस्थळ (Website)
▪️आपले सरकार प्रणाली
▪️ई-ऑफिस (e-Office) वापर
▪️डिजिटल डॅशबोर्ड
▪️व्हॉट्सप चॅटबॉट सुविधा
▪️कृत्रिम बुद्धिमत्ता (AI) व ब्लॉकचेन तंत्रज्ञान
▪️भौगोलिक माहिती प्रणाली (GIS)
या सर्व निकषांमध्ये उत्कृष्ट कामगिरी करत अकोला पोलीस अधीक्षक कार्यालयाने राज्यात तृतीय क्रमांक पटकावला आहे.
३४ जिल्ह्यांमध्ये अकोल्याची झेप
राज्यातील एकूण ३४ जिल्हा पोलीस अधीक्षक कार्यालयांमध्ये दोन टप्प्यांत झालेल्या कठोर मूल्यमापनात अकोला पोलीस दलाने सरस कामगिरी करत अव्वल स्थान मिळवले. या यशामुळे अकोला जिल्ह्याचा मान उंचावला आहे.
टीमवर्कचं यश – सर्वांचा मोलाचा वाटा
या यशामागे तांत्रिक सहकार्य करणारे श्री किशन पनपालीया, पो.उपनि पठाण, पो.हवा. गोपाल मूकंदे, आशिष आमले तसेच सर्व अधिकारी व अंमलदार यांचे मोलाचे योगदान लाभले आहे.
नागरिकांना मिळणार अधिक पारदर्शक सेवा
या डिजिटल उपक्रमांमुळे पोलीस दलाची कार्यक्षमता वाढणार असून नागरिकांना अधिक जलद, पारदर्शक आणि सुलभ सेवा मिळणार आहेत. अकोला पोलिसांच्या या यशाबद्दल सर्व स्तरातून कौतुकाचा वर्षाव होत आहे. पोलीस अधीक्षक अर्चित चांडक यांनी हा मान अकोल्यातील नागरिक, मिडिया आणि संपूर्ण अकोला पोलीस दलाला समर्पित केला आहे—यातून त्यांच्या नेतृत्वाची आणि टीमस्पिरिटची झलक स्पष्टपणे दिसून येते.
