खारेकुरण येथे रंगेहाथ कारवाई; प्रदीप महाजनविरुद्ध गुन्हा दाखल करण्याची प्रक्रिया सुरू
पालघर : प्रतिनिधी
वीज मीटर तपासल्यानंतर वाढीव वीज बिल ‘सेटल’ करून देण्यासाठी ग्राहकाकडे ८ हजार रुपयांची लाच मागणाऱ्या महावितरणच्या वायरमनला पालघर लाचलुचपत प्रतिबंधक विभागाने (एसीबी) रंगेहाथ पकडले. ही कारवाई पालघर तालुक्यातील खारेकुरण येथे करण्यात आली.
प्रदीप सुभाष महाजन (वय ३८), वायरमन (कनिष्ठ तंत्रज्ञ), एमएसईडीसीएल, रा. उमरोळी, ता. जि. पालघर, असे एसीबीच्या कारवाईत पकडण्यात आलेल्या कर्मचाऱ्याचे नाव आहे.
याबाबत एका तक्रारदाराने पालघर एसीबीकडे तक्रार दाखल केली होती. तक्रारदाराच्या घरी महाजन याने वीज मीटरची तपासणी केली होती. त्यानंतर घराचे वाढीव येणारे वीज बिल ‘सेटल’ करून देण्यासाठी त्याने ८ हजार रुपयांची लाच मागितल्याचे तक्रारीत नमूद करण्यात आले होते.
तक्रारीची एसीबीकडून १९ ऑगस्ट २०२६ रोजी दांडीपाडा, खारेकुरण, ता. जि. पालघर येथे पडताळणी करण्यात आली. या पडताळणीदरम्यान महाजन याने तक्रारदाराकडे वीज बिल ‘सेटल’ करण्यासाठी ८ हजार रुपयांची लाच मागितल्याचे निष्पन्न झाल्याचे एसीबीने सांगितले.
यानंतर एसीबीने सापळा कारवाईचे नियोजन केले. २० ऑगस्ट २०२६ रोजी मिठागर रोड, खारेकुरण येथे कायदेशीर सापळा रचण्यात आला. या कारवाईदरम्यान प्रदीप महाजन याला तक्रारदाराकडून ८ हजार रुपयांची लाचेची रक्कम स्वीकारताना रंगेहाथ पकडण्यात आले.
या प्रकरणी पालघर पोलीस ठाण्यात भ्रष्टाचार प्रतिबंधक कायदा, १९८८ (सुधारित अधिनियम २०१८) कलम ७ अन्वये गुन्हा दाखल करण्याची प्रक्रिया सुरू आहे. आरोपीच्या अटकेसंदर्भातील पुढील कायदेशीर प्रक्रिया सुरू असल्याची माहिती एसीबीकडून देण्यात आली.
ही कारवाई पोलीस निरीक्षक राकेश लक्ष्मण डांगे यांच्या नेतृत्वाखाली करण्यात आली. पोलीस उपअधीक्षक दादाराम सुभाष करांडे यांच्या पर्यवेक्षणाखाली सापळा पथकाने कारवाई केली. पथकात पोलीस निरीक्षक राकेश डांगे यांच्यासह पोलीस हवालदार विलास भोये, जितेंद्र गवळी, प्रकाश दळवी आणि आकाश लोहार यांचा समावेश होता.
