लोहा : प्रतिनिधी
लोहा तालुक्यातील धावरी येथील ४२ वर्षीय शेतकरी व मोटारसायकल मेकॅनिक मुंजाजी बालाजी गाडेकर (बाळू पाटील) यांचा सर्पदंशाने उपचारादरम्यान दि. १९ ऑगस्ट रोजी रात्री उशिरा मृत्यू झाला. या घटनेने धावरी परिसरात शोककळा पसरली असून हळहळ व्यक्त करण्यात येत आहे.
मुंजाजी गाडेकर हे अल्पभूधारक शेतकरी होते. शेतीसोबतच कुटुंबाचा उदरनिर्वाह करण्यासाठी ते लोहा येथे मोटारसायकल दुरुस्तीचे काम करत होते. दैनंदिन काम आटोपल्यानंतर ते सायंकाळी शेतात जनावरांसाठी गवताचा भारा आणण्यासाठी गेले होते. त्यावेळी त्यांच्या पायाला विषारी सापाने दंश केल्याचे त्यांच्या लक्षात आले नाही.
घरी परतल्यानंतर त्यांनी जेवण करून झोप घेतली. मात्र मध्यरात्री त्यांना चक्कर येणे, मळमळ होणे आणि पाय जड पडणे अशी लक्षणे जाणवू लागली. त्यांनी ही बाब कुटुंबीयांना सांगितल्यानंतर त्यांना तातडीने लोहा उपजिल्हा रुग्णालयात उपचारासाठी दाखल करण्यात आले.
कर्तव्यावरील वैद्यकीय अधिकाऱ्यांनी त्यांची तपासणी करून पुढील उपचारासाठी नांदेड येथे जाण्याचा सल्ला दिला. त्यानंतर त्यांना नांदेड येथील जिल्हा शासकीय रुग्णालयात दाखल करण्यात आले. मात्र उपचार सुरू असताना रात्री उशिरा त्यांचा मृत्यू झाला.
दि. २० ऑगस्ट रोजी दुपारी धावरी येथे त्यांच्या पार्थिवावर अंत्यसंस्कार करण्यात आले. त्यांच्या पश्चात आई, पत्नी, चार मुली, भाऊ, बहीण असा परिवार आहे.
या घटनेमुळे धावरी परिसरात शोककळा पसरली असून, शेतकरी व ग्रामस्थांकडून गाडेकर कुटुंबीयांप्रती दुःख व्यक्त करण्यात येत आहे.
