प्रतिनिधी – कन्नड :
समाज माध्यमातून पसरत असलेल्या अफवांमुळे पेट्रोल पंपांवर नागरिकांची अनावश्यक गर्दी वाढली असून ठिकठिकाणी लांबलचक रांगा लागल्याचे चित्र दिसत आहे. या पार्श्वभूमीवर मागणी व पुरवठा सुरळीत ठेवण्यासाठी प्रशासनाने महत्त्वाचा निर्णय घेतला आहे.
जिल्हाधिकारी, छत्रपती संभाजीनगर यांनी जीवनावश्यक वस्तू अधिनियम १९५५ अंतर्गत अधिकारांचा वापर करून इंधन विक्रीवर मर्यादा घालण्याचे आदेश जारी केले आहेत.
नवीन नियमांनुसार :
- दुचाकी वाहनांसाठी जास्तीत जास्त २०० रुपयांपर्यंत इंधन देण्यात येईल
- तीन व चारचाकी वाहनांसाठी प्रत्येकी २००० रुपयांपर्यंत इंधन मर्यादा निश्चित करण्यात आली आहे
- बाटली, ड्रम किंवा इतर साठवणुकीच्या भांड्यांमध्ये इंधन देण्यास सक्त मनाई करण्यात आली आहे
हे आदेश सर्व पेट्रोल पंपांवर परिपत्रकाद्वारे लागू करण्यात आले असून सूचना फलकही लावण्यात आले आहेत.
नागरिकांनी अफवांवर विश्वास न ठेवता प्रशासनाला सहकार्य करावे, असे आवाहन जिल्हा पुरवठा अधिकारी, छत्रपती संभाजीनगर यांनी केले आहे.
