२१ ऑगस्टला पालघरमध्ये ‘District Investment Summit 2026’; उद्योग व गुंतवणुकीच्या नव्या संधींवर होणार मंथन
पालघर : प्रतिनिधी
पालघर जिल्ह्याच्या औद्योगिक विकासाला अधिक गती देण्यासाठी तसेच जिल्ह्यात नव्या गुंतवणुकीला प्रोत्साहन देऊन स्थानिक पातळीवर रोजगाराच्या संधी निर्माण करण्याच्या उद्देशाने ‘पालघर जिल्हा गुंतवणूक परिषद २०२६’ (District Investment Summit 2026) आयोजित करण्यात आली आहे.
जिल्ह्यातील उद्योग, सेवा क्षेत्र आणि गुंतवणुकीला चालना देण्याच्या दृष्टीने ही परिषद महत्त्वपूर्ण ठरणार आहे. पालघर जिल्ह्यातील उपलब्ध औद्योगिक क्षमता, पायाभूत सुविधा, गुंतवणुकीच्या संधी आणि स्थानिक रोजगारनिर्मितीच्या संभाव्यतेवर परिषदेत चर्चा होणार आहे.
ही परिषद महाराष्ट्र राज्याचे वनमंत्री तथा पालघर जिल्ह्याचे पालकमंत्री गणेश नाईक यांच्या अध्यक्षतेखाली आणि उद्योग आयुक्त डॉ. कादंबरी बलकवडे (भा.प्र.से.) यांच्या मार्गदर्शनाखाली होणार आहे.
यावेळी वैभव वाघमारे (भा.प्र.से.), विशेष आयुक्त (MAITRI), महाराष्ट्र शासन तसेच डॉ. इंदू राणी जाखड (भा.प्र.से.), जिल्हाधिकारी तथा जिल्हादंडाधिकारी, पालघर यांची प्रमुख उपस्थिती राहणार आहे. जिल्हा उद्योग केंद्र, पालघर तसेच उद्योग व सेवा विभाग, कोकण विभागातील अधिकारी या परिषदेच्या आयोजनात सहभागी आहेत.
शुक्रवार, २१ ऑगस्ट २०२६ रोजी सकाळी १० वाजता जिल्हाधिकारी कार्यालयातील जिल्हा नियोजन समिती सभागृह, पालघर येथे या गुंतवणूक परिषदेचे आयोजन करण्यात आले आहे.
पालघर जिल्ह्यात औद्योगिक गुंतवणुकीला चालना देण्यासोबतच स्थानिक युवकांना रोजगाराच्या अधिकाधिक संधी उपलब्ध करून देण्यासाठी ही परिषद महत्त्वाची ठरण्याची अपेक्षा व्यक्त केली जात आहे. मागील जिल्हास्तरीय गुंतवणूक परिषदेत विविध क्षेत्रांतील उद्योगांसोबत मोठ्या प्रमाणात गुंतवणूक करार झाले होते. त्यामुळे यंदाच्या परिषदेकडेही उद्योग क्षेत्राचे विशेष लक्ष लागले आहे.
