मेहकर (प्रतिनिधी) :
मेहकर तालुक्यातील अनेक शेतकरी शेतकरी सन्मान योजनेच्या लाभापासून अद्याप वंचित असल्याने शेतकऱ्यांमध्ये तीव्र नाराजी व्यक्त होत आहे. या पार्श्वभूमीवर यशवंत सेनेचे जिल्हा संपर्कप्रमुख गजानन माधव बोरकर यांनी प्रशासनाला निवेदन देत ६ एप्रिल रोजी सकाळी ११ वाजता तालुका कृषी कार्यालयात अर्धनग्न आंदोलन करण्याचा इशारा दिला आहे.
निवेदनात नमूद केल्याप्रमाणे, केंद्र सरकारकडून शेतकऱ्यांच्या हितासाठी सुरू करण्यात आलेल्या शेतकरी सन्मान योजनेचा लाभ अनेकांना होत असला तरी मेहकर तालुक्यातील शेकडो शेतकरी अजूनही या योजनेपासून वंचित आहेत. अनेक शेतकऱ्यांनी अर्ज करूनही त्यावर कोणतीही कार्यवाही होत नसल्याचा आरोप करण्यात आला आहे.
तसेच तालुका कृषी कार्यालयातील अधिकारी व कर्मचारी शेतकऱ्यांकडे दुर्लक्ष करत असून, वेळेवर कार्यालयात उपस्थित राहत नसल्याची तक्रारही निवेदनात करण्यात आली आहे. त्यामुळे गोरगरीब व अल्पभूधारक शेतकऱ्यांना मोठ्या अडचणींचा सामना करावा लागत आहे.
यासंदर्भात तातडीने कारवाई करून प्रलंबित अर्ज निकाली काढावेत व प्रत्येक पात्र शेतकऱ्याला योजनेचा लाभ मिळावा, अशी मागणी करण्यात आली आहे. अन्यथा ६ एप्रिल रोजी अर्धनग्न आंदोलन छेडण्यात येईल, असा इशारा देण्यात आला आहे.
दरम्यान, या आंदोलनादरम्यान कोणतीही अनुचित घटना घडल्यास त्याची जबाबदारी प्रशासनावर राहील, असेही बोरकर यांनी स्पष्ट केले आहे.
