मुंबई (परळ) : प्रतिनिधी
दि. १५ मार्च २०२६ रोजी मुंबई (परळ) येथे आयोजित जागतिक महिला दिनानिमित्त कार्यक्रमात श्रीमती लक्ष्मीबाई गणपत पाटील लोखंडे (रा. बंराजळा, ता. भोकरदन, जि. जालना) यांना ‘माँसाहेब मीनाताई ठाकरे जीवनगौरव पुरस्कार २०२६’ प्रदान करण्यात आला. सांस्कृतिक क्षेत्रातील त्यांच्या उल्लेखनीय योगदानाबद्दल हा सन्मान देण्यात आला.
हा कार्यक्रम सुभाष डामरे मित्र मंडळ व शिवराज प्रतिष्ठान, परळ यांच्या संयुक्त विद्यमाने आयोजित करण्यात आला होता. संस्थापक अध्यक्ष श्री. आनंदगावकर, संचालक श्री. सुधीरभाऊ साळवी (शिवसेना सचिव) तसेच आमदार महेश सावंत यांच्या मार्गदर्शनाखाली कार्यक्रम पार पडला.
या वेळी मुंबई महानगरपालिकेच्या नगरसेविका सौ. भारती पेडणेकर यांच्या हस्ते लक्ष्मीबाई लोखंडे यांना महावस्त्र, पैठणी व ट्रॉफी देऊन गौरविण्यात आले. कार्यक्रमास सुवर्णा कुलकर्णी, रूपेश कोचरेकर (सरचिटणीस), तसेच कवयित्री व सिनेस्टार सौ. शशिकला पाटील गुंजाळ यांच्यासह विविध क्षेत्रातील मान्यवर, पत्रकार आणि महिला मंडळ उपस्थित होते.
लक्ष्मीबाई लोखंडे यांनी गेल्या ३० वर्षांपासून लोककला क्षेत्रात मोलाचे योगदान दिले आहे. २०२२ मध्ये महाराष्ट्र शासनाने त्यांची ‘लोककलावंत महिला शाहिरा’ म्हणून निवड केली होती. त्यांच्या कार्याची दखल घेत त्यांना आतापर्यंत ५० हून अधिक राष्ट्रीय पुरस्कारांनी गौरविण्यात आले आहे.
या सन्मानाबद्दल राज्यातील विविध जिल्ह्यांतील मान्यवरांनी त्यांचे अभिनंदन केले असून, त्यांच्या कार्यातून समाजातील महिलांना प्रेरणा मिळेल, असा विश्वास व्यक्त केला जात आहे.
